<p>“Telegram” platformasında “Qarabağ”ın azarkeş səhifilərindən biri izləyicilər arasında sorğu keçirib.</p><p>Sorğuda noyabr ayının ən yaxşı futbolçusunun adına aydınlıq gəlib.</p><p>Bəribaşdan qeyd edək ki, siyahıda 3 futbolçunun adı yer alıb: Ovusu Kvabena, Şahruddin Məhəmmədəliyev və Musa Qurbanlı.</p><p>Hər nə qədər qəribə səslənsə də, Kadi Borgeslə Ramil Şeydayev siyahıdan kənarda qalıb.</p><p>700-ə yaxın izləyicinin qatıldığı sorğuda Musa həmkarlarını qabaqlayıb. Qurban Qurbanovun oğlu səslərin 58 faizinə (387 səs) sahib olub. Şahruddin 33 faizlə (224 səs) 2-ci, Ovusu 9 faizlə (61 səs) 3-cü yeri tutub.</p> <p>Musa Qurbanlı noyabr ayında Premyer Liqada “Qarabağ”ın heyətində 3 oyunda 175 dəqiqə şans qazanıb və 1 qola imzasını yazdırıb.</p><p>Avropa Liqasında “Frayburq”la qarşılaşmada 3 dəqiqə meydanda olub. Azərbaycan millisində isə 2 qarşılaşmada 156 dəqiqə oynayıb və yığmada qol hesabını açıb.</p><p><strong>HƏBİB / SPORTİNFO.A</strong>Z</p>
<p>“İşğaldan azad edilmiş ərazilərdə təmiz ətraf mühitin təmin olunması yaxın 10 ildə əsas strateji istiqamətlərdəndir”.</p><p>Bunu ekologiya və təbii sərvətlər nazirinin müavini Rauf Hacıyev İqtisadiyyat Nazirliyi və Dünya Bankının birgə təşəbbüsü ilə keçirilən “Azərbaycan yaşıl inkişafa doğru” hesabatın təqdimatında bildirib.</p><p>O, qeyd edib ki, Azərbaycan torpaqlarının işğaldan azad edilməsi yeni imkanlar yaradıb:</p><p>“Azad edilmiş torpaqlarda “yaşıl” enerji, “yaşıl” kənd təsərrüfatı və “yaşıl” texnologiyaların tətbiqi üçün çox böyük potensial var.</p><p>Bu ərazilərin bərpası zamanı müasir yanaşmaların tətbiqi gələcəkdə Qarabağın ekoloji problemlərdən azad “yaşıl” zonaya çevrilməsinə gətirib çıxaracaq”.</p> <p>R.Hacıyev qeyd edib ki, Azərbaycanda iqtisadiyyatın “yaşıl” texnologiyalar əsasında inkişafına investisiyalar hər il artır:</p><p>“Böyük investisiya tələb edən sahələrin inkişafı ətraf mühitin mühafizəsi və insan sağlamlığının qorunması baxımından da özünü doğruldur.</p><p>“Yaşıl” iqtisadiyyata keçid mərhələsində resurslara qənaət, xammaldan təkrar istifadə, sənayedə ətraf mühitə dost texnologiyaların tətbiqi kimi məsələlərdə daha məsuliyyətlə hərəkət etməliyik və beynəlxalq əməkdaşlığı gücləndirməliyik”.</p>
<p>DÇ-2022-nin 1/8 final mərhələsindən sonra milli komandada ən çox oyun keçirən futbolçuların siyahısı açıqlanıb.</p><p><strong>Sportinfo.az</strong> xəbər verir ki, cədvəldəki yeganə azərbaycanlı futbolçu Rəşad Sadıqovun mövqeyi dəyişib.</p><p>Millimizin sabiq kapitanı 2 pillə geriləyib. Bu, iki futbolçunun yığmada 111 matç keçirən “14 nömrə”ni keçməsi ilə bağlıdır.</p><p>Hazırda Sadıqov dünyada 332-ci yeri bölüşür. Onu arxada qoyan futbolçular isə Braziliya millisinin kapitanı Tyaqo Silva və İsveçrə yığmasının oyunçusu Cerdan Şakiridir. Bu futbolçular 1/8 finalda 112-ci dəfə milli forma geyinib.</p> <p>İsveçrə yığmasının kapitanı Qranit Caka isə 111-ci oyununa çıxıb. O, təmsilçimizə yeni şərik olub.</p><p>1/8 finalda Braziliya Cənubi Koreyaya 4:1 hesabı ilə qalib gəlibsə, İsveçrə Portuqaliyaya uduzub – 1:6.</p>
<p>"Moskvada keçirilən üçtərəfli işçi qrupunun dünənki iclasında dəmir yolunun açılması məsələsi ilə bağlı konkret nəticə qeydə alınmayıb".</p><p>Bunu dekabrın 7-də parlamentdə hökumət saatında Ermənistanın baş naziri Nikol Paşinyan deyib.</p><p>“Yerasx (Arazdəyən) -Ordubad-Meğri-Horadiz dəmir yolunun açılması məsələsi müzakirə olunub. Mən deyə bilmərəm ki, bizim konkret nəticələrimiz var, amma bir daha təsdiq etmək istəyirəm ki, Ermənistan bu proqramın həyata keçirilməsinə hazırdır və maraqlıdır. Təklifimiz hələ də qüvvədədir” - Paşinyan bildirib.</p><p>Baş nazir iddia edib ki, Ermənistan dəmir yolunun bərpasına bir gün əvvəl başlamağa hazırdır: “Əvvəllər biz öz fikirlərimizi bildirdik və bu proses ətrafında ortaq məqamlar qeydə alınan andan dəmir yolunun bərpası ilə bağlı işə başlamağa hazırıq. Dəmir yollarının və avtomobil yollarının Ermənistan qanunvericiliyi çərçivəsində fəaliyyət göstərməsi barədə anlayışımız haqqında danışmağı lüzumsuz hesab edirəm”.</p> <p>N.Paşinyan deyib ki, müzakirələr təkcə dəmir yolu ilə bağlı olsa da, yollar məsələsi də gündəmdədir: “Bununla əlaqədar olaraq, biz əvvəllər qeyd etdiyimiz 3 keçid məntəqəsini açmağa, eləcə də ən yaxşı marşrutla yeni yol infrastrukturlarını yaratmağa və qurmağa hazırıq. Bu, bizim yolumuzdur və biz böyük beynəlxalq tranzitin təmin edilməsini gözləyirik və yenə də Ermənistan qanunvericiliyi çərçivəsində bu yolların açılmasına və tikintisinə bir dəqiqə tez başlamağa hazırıq. Bu baxımdan bizdə siyasi iradənin çatışmazlığı yoxdur”.</p><p>Xatırladaq ki, dekabrın 6-da Moskvada Ermənistan baş nazirinin müavini Mher Qriqoryanın, Rusiya baş nazirinin müavini Aleksey Overçukun və Azərbaycanın baş nazirinin müavini Şahin Mustafayevin iştirakı ilə üçtərəfli işçi qrupunun 11-ci iclası keçirilib.</p>
<p>Britaniyalı jurnalist Pirs Morqan sosial şəbəkə hesabında Portuqaliya yığmasının DÇ-2022-nin 1/8 final mərhələsində İsveçrə üzərində qazandığı qələbəni (6:1) şərh edib.</p><p><strong>Sportinfo.az</strong> xəbər verir ki, o, Kriştiano Ronaldo ilə bağlı da fikirlərini bildirib:</p><p>“Portuqaliya möhtəşəm oynadı! Ronaldo mənə dünya çempionatını qazana biləcəklərini düşündüyünü deyib. Onlar bunu bacara bilərlər”.</p><p>Kriştianonun əvəzinə oyuna start heyətində başlayan 21 yaşlı Qonsalo Ramos mundialda ilk het-trik müəllifi kimi tarixə düşüb.</p> <p>Portuqaliya millisi DÇ-2022-nin 1/4 final mərhələsində Mərakeşlə qarşılaşacaq.</p>
<p>Ötən mövsüm icarə müqaviləsi əsasında "Neftçi"də çıxış edən Mert Çelik mövsümün əvvəli məxsus olduğu "Başakşehir" komandasına geri dönmüşdü.</p><p>Hətta adçəkilən klubun düşərgəsində yeni mövsümün hazırlığına da qatılmışdı.</p><p>Amma son anda yenidən "ağ qaralar"ın düşərgəsinə qayıtmalı oldu. Səbəb paytaxt klubunda ciddi müdafiəçi azlığının olmasıydı.</p><p>Həm də Konfrans Liqasında "Rapid"lə səfər matçına hazırlaşan "Neftçi"yə iki cəbhədə mübarizə aparmaq üçün heyətin genişlənməsi şərt idi.</p><p>Daha yaxşısı tapılmayınca, Regekampf Mertə möhtac qalmalı oldu.</p><p>Açığı, ikinci dönüş startda az fayda vermədi.</p><p>Avqustun 3-ü dürgəyə qoşulan müdafiəçi 7-si Şamaxı səfərində 90 dəqiqə, 11-i isə Vyanada 100 dəqiqə meydanda oldu.</p><p>Premyer Liqanın 2-ci turunda "Kəpəz" üzərində qazanılan qələbədə (5:2) o da 90 dəqiqə meydanda idi.</p><p>Mert üçün yaxşı startın pis istiqamətə yan aldğı matç 3-cü turun "Sabah"la oyunu oldu.</p> <p>Əsas rəqiblərdən birinə məğlubiyyətdən (1:2) sonra rumıniyalı mütəxəssis onu "qara siyahısı"na saldı.</p><p>Hər halda, arxada qalan 4 aya yaxın müddətdə daha 13 tur oynanılıb. Bu görüşlərdə 22 yaşlı futbolçuya bir dəqiqə belə şans verilməyib.</p><p>Halbuki, zaman-zaman müdafiə xəttinin bir neçə üzvü zədələnib, cəzalı duruma düşüb. Amma çıxılmaz duruma düşdüyü anlarda da əcnəbi çalışdırıcı türk əsilli futbolçuya etimad göstərməyib.</p><p>Maraqlıdır, cəmi 4 oyun üçünmü onun Türkiyədən bura gəlməsi üçün canfəşanlıq edilirdi?</p><p>Mert həm də Azərbaycan millisinin sabiq üzvüdür. 22 yaş əsl oynamalı zamandır. Bu yaşda burada ehtiyatda gününü keçirtməkdənsə, daim oynayacağı yerdə olsa daha yaxşı olardı.</p><p><strong>XANOĞLAN / SPORTİNFO.AZ</strong></p>
<p>Region Liqasında yeni mövsümün startından cəmi 4 tur keçib.</p><p>Respublikanın bütün bölgələrini əhatə edən yarışda əsas mübarizə hələ qabaqdadır.</p><p>Buna rəğmən, artıq bir neçə iştirakçı müxtəlif problemlərlə üzləşib. Onun başında da maliyyə çatışmazlığı dayanır. </p><p>AFFA-dan redaksiyamıza daxil olan məlumata görə, 4-5 komandanın futbolçuları bu məqsədlə federasiyaya müraciət edib.</p><p>Onlar formalarını geyindikləri klubların rəhbərliyinin vədlərini yerinə yetirməməsindən, pullarını ala bilməməsindən şikayətlənib.</p><p>Qurum da öz növbəsində həmin bölgə təmsilçilərinin rəsmiləri ilə əlaqə saxlayıb, yaranan problemlərin təcili həll edilməsini istəyib.</p> <p>Bildirilib ki, əks halda, Region Liqasından kənarlaşdırılacaq və bir daha bu çempionata buraxılmayacaqlar.</p><p>Ötən mövsüm analoji səbəbdən «Şahdağ» mövsümün əvvəlində çıxışını dayandırıb. Xanbaba Daşdının prezidenti olduğu Quba təmsilçisi pulsuzluqdan qış fasiləsi gəlməmiş Region Liqasını tərk edib.</p><p><strong>SPORTİNFO.AZ</strong></p>
