<p><strong>Adam siyasi bir klounluğu sayəsində yaxşı maddi sərvət topladı, ancaq bütün bu sərvət onu xoşbəxt etdimi?</strong></p> <p>Rusiya Federasiyası Kommunist Partiyası Moskva şəhər komitəsinin katibi, Rusiya Federasiyası Kommunist Partiyası Mərkəzi Komitəsinin üzvlüyünə namizəd, Dövlət Dumasının deputatı Denis Parfyonov Liberal Demokrat Partiyasının “hakimiyyətin ayaqları arasında sallandığını” söylədi. Bu açıqlamanı o, Dövlət Dumasına namizədlərin seçkiqabağı debatında çıxış edərkən verdi.</p> <p>“Dövlət Dumasında dörd partiya var, lakin onlardan üçü hakimiyyətin ayaqlarıdır: sağ ayağı olan "Vahid Rusiya", sol ayağı "Ədalətli Rusiya"dır. Və Jirinovski bu ayaqların ortasında sallanır”, - deyə bildirdi.</p> <p>Əslində, Parfyonov yeni bir şey demədi. Mərhum Vasili Şandibinin on il bundan əvvəl dediklərini təkrarladı. Rusiya Federasiyası Kommunist Partiyasının liderlərindən biri olan və sonra Rusiya Aqrar Partiyasına keçən siyasətçi, artıq Rusiyanın bütün siyasi sistemi və Jirinovskinin oradakı yeri haqqında ən doğru tərifi vermişdi.</p> <p>Vladimir Volfoviç indi eyni Parfyonova qışqıra, çımxıra, qəzəblənə bilər, amma həqiqət budur ki, Rusiya Liberal Demokrat Partiyası və Jirinovski həqiqətən də Parfyonovun indi təkrar etdiyi, Şandibinin müəllifi olduğu sözlərə layiqdir. Və bu, prinsipcə axmaq olmaqdan uzaq olan bir insanın şəxsi faciəsidir.</p> <blockquote> <p>Bəli, Vladimir Jirinovski heç də axmaq deyil. Çox savadlıdır, mükəmməl təhsillidir, həmişə öz üzərində çalışıb və işləməyə davam edir. Ancaq bütün bunlar Liberal Demokrat Partiyasının daimi liderinin cəmiyyət qarşısında ona hörmət vəd etməyən bir rol seçməsinin sadə səbəbi ilə dəyərsizdir. O, siyasi bir kloun rolunu oynayır. Bəli, bunun sayəsində yaxşı maddi sərvət toplayıb, ancaq bütün bu pullar onu xoşbəxt etdimi? Ehtimal ki, yox.</p> </blockquote> <p>Hələ iyun ayında Dövlət Dumasının Liberal Demokrat Partiyasından olan vitse-spikeri, Jirinovskinin oğlu İqor Lebedev ölkənin siyasi həyatında iştirakını dayandırdığını və növbəti parlamentə namizəd olmayacağını açıqladı. Məlum oldu ki, o, bunu atası ilə uzun sürən bir münaqişə səbəbindən edib. Rusiya parlamentindəki iki həmsöhbət RBC-yə bildirib ki, Lebedev və Jirinovskinin həm maliyyə problemləri, həm də partiyanın inkişafı, partiya və Duma vəzifələrinə insanların təyin edilməsi ilə bağlı uzun müddətdir fikir ayrılıqları olub.</p> <p>Ancaq hamı bilirdi ki, Jirinovski əvvəlcə Lebedevə Liberal Demokrat Partiyasını miras kimi qoymağı planlaşdırırdı. Lakin, hətta bu da baş vermədi. Jirinovskinin gedişindən sonra istər fiziki, istər siyasi olsun, ayaqlar arasında sallanan bu partiyanın gələcəyi çox qeyri-müəyyəndir. Vladimir Volfoviçin özünə gəlincə, o, sağlığında nekroloqunu korlamağı bacardı.</p> <p>Ona təkcə Rusiyada deyil, Azərbaycanda, Ukraynada, Qazaxıstanda da eyni dərəcədə nifrət edirlər. Və səbəbsiz deyil. Ən son nümunə, Rusiya Liberal Demokrat Partiyası liderinin doğulduğu və böyüdüyü respublikaya qarşı aşağılayıcı kobudluğudur.</p> <blockquote> <p>“Bizə bağırırlar: “rus donuzları" deyir və ya Qazaxıstanı rusların qurduqlarından imtina etməyə məcbur edirlər. Mən orada doğulmuşam, deyirəm, Qazaxıstanda bütün şəhərləri, fabrikləri, zavodları, universitetləri, muzeyləri ruslar tikdiriblər. Hər şeyi! Axı oranın yerli əhalisi çöldə idi, köçərilərdir, bir yurtada yaşayırdılar”, - deyə Jirinovski “Rusiya-1” telekanalında, propoqandoist Vladimir Solovyovun proqramında hayqırdı.</p> </blockquote> <p>Dövlət Dumasının deputatı Vladimir Jirinovskinin Qazaxıstanla bağlı açıqlamaları ciddiyə alınmamalıdır. “Azattyq Ryhy” xəbər verir ki, bu fikri Qazaxıstan Respublikası Prezident Administrasiyası rəhbərinin birinci müavini Dauren Abayev səsləndirib. "Biz çoxdan Jirinovskinin Qazaxıstanla bağlı açıqlamalarını ciddi qəbul etməyi tərgitməliyik. Ortada davamlı bir şou var, siyasət yoxdur. Təbii ki, seçkilərdən əvvəl xal qazanmaq cəhdidir. Hamısı budur”, - Abayev deyib.</p> <p>O, haqlıdır. Jirinovskidən hamınln zəhləsi gedir, o, lağa qoyulur, onu “ayaqlar arasında sallanan” adam adlandırırlar. Və bu, şüurlu şəkildə siyasi kloun rolunu seçən birinin həyatında məntiqli, lakin faciəli bir sonluqdur.</p> <div class="embed-responsive" embed-responsive-16by9 mb-4"> <iframe class="embed-responsive-item" src="https://www.youtube.com/embed/nNzBxMhwNjc" allowfullscreen></iframe> </div>
<p><strong>Hərbçilər məsuliyyəti öz üzərlərinə götürmək barədə qərar qəbul ediblər</strong></p> <p>Qvineyada qiyamçıların lideri polkovnik Mamadi Dumbuya Prezident Alfa Kondenin həbs olunduğunu elan edib. AYNA xəbər verir ki, bu barədə TASS məlumat yayıb.</p> <p>Xəbərə görə, M.Dumbuya çıxışında bildirib ki, ölkədə sosial, siyasi və iqtisadi vəziyyət həddən artıq ağır olduğu üçün hərbçilər Qvineyanın gələcəyi üçün məsuliyyəti öz üzərlərinə götürmək barədə qərar qəbul ediblər.</p> <p>Polkovnik ölkədə Konstitusiyanın qüvvəsini dayandırdığını, parlamentin buraxıldığını, sərhədlərin bağlanıldığını bəyan edib və hərbçiləri kazarmalarda qalmağa çağırıb.</p> <p>Dumbuya Milli Birlik və İnkişaf Komitəsinin lideri postunu tutduğunu bildirib. Qeyd edib ki, bu Komitənin məqsədi dövlətin qarşısında duran problemlərin həlli üçün ölkənin bütün vətəndaşlarını birləşdirməkdir.</p>
<p><strong>Lavrovun düşüncələri daha çox bütün ölkələrin proletarlarını birləşdirməyin zəruriliyinə dair şüara bənzəyir</strong></p> <p>Rusiyanın xarici işlər naziri Sergey Lavrov milli-mədəni birliklərin nümayəndələri ilə görüşündə maraqlı bir açıqlama verdi. Nazir son 30 il ərzində postsovet məkanı ölkələrində, xüsusən də əmək miqrantlarının böyük bir hissəsinin Rusiyaya gəldiyi Mərkəzi Asiya bölgəsində rus dilinin mövqeyinin zəiflədiyini bildirdi.</p> <p>"Son 30 ildə təəssüf ki, rus dili çox tez mövqelərini itirməyə başladı. Bir çox ölkədə, son zamanlarda suverenlik qazanan və öz mədəniyyətini qorumaq istəyən ölkələr üçün tamamilə təbii olan milli dilin təbliğinə önəm verildi”, söylədi: “Ancaq eyni zamanda bir sıra hallarda rus dili birdən -birə mövqeyini kəskin itirdi. İşçi miqrantlarının böyük hissəsini təmin edən qonşularımız, o cümlədən Mərkəzi Asiya ölkələri bunu başa düşürlər".</p> <p>Lavrovun sözlərinə görə, indi Tacikistan və Özbəkistanla, eləcə də "[rus dili] rəsmi olan və kifayət qədər yaxşı qorunan" Qırğızıstanla birlikdə Rusiya tərəfi bütövlükdə universitetlərin və məktəblərin yaradılması haqqında proqram həyata keçirir. "Bu, Federasiya Şurasının fəal şəkildə dəstəklədiyi təşəbbüslərdən biridir", - dedi Lavrov: “Şəxsən [Rusiya Parlamentinin Yuxarı Palatasının sədri] Valentina Matvienko Tacikistana səfərlərindən birində Tacikistan Prezidenti Emoməli Rahmonla birlikdə belə bir təşəbbüs göstərdi. Artıq həyata keçirilir və digər dövlətlər də buna maraq göstərirlər. Və biz bunu fəal şəkildə yayacağıq".</p> <blockquote> <p>Rusiya diplomatik xidmətinin başçısının qeyd etdiyi kimi, Moskva qonşuların "rus dilinin qorunmasını Rusiya istədiyi üçün deyil, karyera və məşğulluq imkanlarını əhəmiyyətli dərəcədə genişləndirdiyi üçün anlayacaqlarını" gözləyir. "Belə bir xətti davam etdirəcəyik", dedi. Və bu çıxışı şərh etməmək sadəcə mümkün deyil. Ağrılı bir mövzudur.</p> </blockquote> <p>Belə ki, Lavrov hər kəsi Tacikistan, Özbəkistan və Qırğızıstandan nümunə götürməyə dəvət edir. Bu məsələni ardıcıllıqla araşdıraq. Beləliklə, koronavirus pandemiyası və sərhədlərin bağlanması Rusiya Federasiyasındakı əcnəbilərin sayının əhəmiyyətli dərəcədə azalmasına səbəb oldu. Bu faktı Rusiya Eləmlər Akademiyası və Qaydar İnstitununun ekspertlərinin keçirdiyi birgə montorinq qeydə aldı. 2019 -cu ildə Rusiya Federasiyasında aydan asılı olaraq 9,6 milyondan 11,2 milyona qədər əcnəbi vardısa, 2020 -ci ildə onların sayı yanvarın sonunda 10,3 milyondan ilin sonunda 7,1 milyona qədər düşdü. 2021 -ci ildə ziyarətçilərin sayında azalma davam etdi - 1 may tarixinə ölkədə xarici vətəndaşların sayı 5,66 milyon təşkil etdi. Ən çox Ukrayna və Moldova vətəndaşlarının sayı müvafiq olaraq 53% və 51%, Qırğızıstan (18%), Ermənistan (22%) və Tacikistan (35%) vətəndaşlarının burada sayı azalıb.</p> <p>Gördüyünüz kimi, vətəndaşları sona qədər və bütün gücləri ilə Rusiyada qalmağa çalışan üç ölkədən ikisi Sergey Lavrovun nümunə göstərdiyi ölkələrdir. Bunun başqa bir izahı var. Dünya Bankının araşdırmalarına görə, tacik ailələrinin 40% -dən çoxu pandemiya zamanı qida istehlakını azaldıb. Ən çox əmək miqrantlarının ailələri əziyyət çəkib.</p> <p>Bankın analitiklərinə görə, ölkə yoxsulluğun ümumi səviyyəsində artım gözləməlidir: axı Tacikistanda yoxsul ailələr varlı ailələrdən daha çox pul köçürmələrindən asılıdır. Xaricdəki qohumlarından pul köçürmələri alan ev təsərrüfatlarının 80% -dən çoxu gələn pulu əsasən ərzaq və digər zəruri ehtiyaclara xərclədiklərini bildiriblər.</p> <p>Beləliklə, Orta Asiya respublikalarının vətəndaşlarının rus dilini öyrənmək istəyi, bir çoxları üçün Rusiyanın pul qazanmaq üçün prioritet yer olaraq qalması ilə izah olunur. Bu respublikalarda vəziyyət çox ağırdır. Üstəlik, burada ənənəvi olaraq çoxuşaqlı ailələr var. Onları qidalandırmaq üçün Mərkəzi Asiya ölkələrindən olan “qastabayterlər” Rusiya Federasiyasında ksenofobiyanın həddindən artıq səviyyəsi də daxil olmaqla, çox şeyə dözməyə hazırdırlar.</p> <p>Moldovalılar və ukraynalılar - bu ölkələr AB ilə vizasız rejim aldıqdan sonra alternativə malik oldular və dərhal bundan istifadə etdilər. Orta Asiya respublikalarının vətəndaşları üçün Çin Rusiyaya alternativdir. Beləliklə, uzunmüddətli perspektivdə, ÇXR -in sürətlə inkişaf edən iqtisadiyyatı nəzərə alınmaqla, Mərkəzi Asiya ölkələrində Çin dilini öyrənmək istəyənlərin sayı əhəmiyyətli dərəcədə artacaq.</p> <blockquote> <p>Türk dilini öyrənənlərin sayı da artacaq. Buna mədəni və dil yaxınlığı və Türkiyədə həyat səviyyəsinin Rusiyadan daha yüksək olması təsir edir. Əlbəttə ki, Türkiyədə Rusiyada olduğundan fərqli olaraq, etnik zəmində heç bir pozuntu yoxdur və ola da bilməz. Əslində Levada Mərkəzinin ötən payızda keçirdiyi bir sorğunun nəticələrini göstərmək kifayətdir.</p> </blockquote> <p>Sorğu Rusiyada ksenofobiya və millətçilik məsələlərinə həsr olunmuşdu. Və "Ruslar üçün Rusiya" ideyasına münasibətiniz necədir?” sualına respondentlərin 51% -i bu fikri qəbul etdi və ya dəstəklədi (19% qeyd -şərtsiz dəstəklədi, 32% bunu həyata keçirməyin gözəl olacağını söylədi). 29% “Ruslar üçün Rusiya” əsl faşizmdir" şüarına inanır. Bundan əlavə, respondentlərin 73% -i bildirib ki, Rusiya hakimiyyəti başqa ölkələrdən Rusiyaya işləmək üçün gələn əmək miqrantlarının axınını məhdudlaşdırmalıdır. Bu göstərici 2017-ci ili iyulundan bəri ən yüksək göstəricidir.</p> <p>Bu rəqəmlər Rusiya Federasiyasında hökm sürən əsl əhval-ruhiyyəni açıq şəkildə nümayiş etdirir. Həm də Rusiyanın niyə əmək miqrasiyası üçün getdikcə daha az cəlbedici bir yerə çevrildiyini izah edirlər. Üstəlik, Rusiyanın özündə işsizlik artır və iqtisadi problemlər artır. Buna görə, vaxtilə SSRİ-nin tərkibində olan respublikaların milyonlarla vətəndaşının artıq rus dilini öyrənmək həvəsi yoxdur.</p> <p>Rus gənclərinin özü ingilis dilini intensiv öyrənirsə, nədən danışmalıyıq. Nə üçün? Bu sualın cavabı Ümumrusiya İctimai Fikri Öyrənmə Mərkəzinin ötən ilin payızına dair sorğusunun məlumatları ilə verilir. Respondentlərin fikrincə, əksər hallarda özləri üçün ölkədən getmə perspektivləri 18-24 yaş arası gənclər tərəfindən düşünülür - bu qrupdakı insanların 38% -i sorğu zamanı belə bir istəklərini bildirmişdilər. 25-34 yaş qrupunda 31% -i getmək istəyir. Bu reallığın fonunda keçmiş SSRİ ölkələrində rus dilinin mövqelərini gücləndirməyin zəruriliyi ilə bağlı düşüncələr daha çox bütün ölkələrin proletarlarını birləşdirməyin zəruriliyinə dair bir şüara bənzəyir...</p>
<p><strong>Bəlucistanda terrorçu-kamikadze nəzarət-buraxılış məntəqəsinə hücum edib</strong></p> <p>Pakistanın cənub-qərbindəki Bəlucistan əyalətində bir terrorçu-kamikadze nəzarət-buraxılış məntəqəsinə hücum edərək partlayış törədib. AYNA xarici mediaya istinadən bildirir ki, partlayış nəticəsində 3 nəfər ölüb, 20 nəfər yaralanıb.</p> <p>Pakistan Daxili İşlər Nazirliyinin Terrorla Mübarizə İdarəsindən verilən məlumata görə, motosikletli terrorçu polis maşınına çırpılıb və daha sonra motosikletə quraşdırılmış bomba partlayıb.</p> <p>Hadisə yerinə xilasedicilər, hüquq-mühafizə orqanlarının əməkdaşları gəlib. Zərərçəkənlər xəstəxanalara yerləşdirilib.</p>
<p><strong>Ekspert: “Azərbaycanda peyk internetinin əldə olunmasının mümkünlüyü ilə bağlı heç bir rəsmi məlumat yoxdur”</strong></p> <p>Azərbaycanda koronavirus pandemiyası fonunda bütün dünyada olduğu kimi internet trafikinin istehlakı da artdı. Şəbəkənin keyfiyyəti hələ də arzuolunmaz olsa da, ölkədə göstərilən xidmətlərin həcmi demək olar ki, 27 faiz artıb.</p> <p>Artan istehlakın səbəbləri olduqca başa düşüləndir - karantin dövründə əhali internetdən daha çox istifadə etməyə başladı. Xatırlayırsınızsa, son bir ildə qlobal şəbəkəyə artan tələbatla birbaşa əlaqəli bir neçə əhəmiyyətli hadisə baş verdi. Bunlar təhsil müəssisələrinin onlayn təhsilə keçməsi, dövlət və özəl şirkətlərdə çalışan işçilərin əksəriyyətinin "uzaqdan iş" rejiminə keçməsidir. Elə ticarət və iaşə müəssisələri də elektron sifarişlərə keçdi.</p> <p>Nəhayət, karantin səbəbindən evlərində kilidlənən vətəndaşlar restoranları, idman salonlarını və teatrları ziyarət etmək imkanına sahib olmayaraq, vaxtlarını internetdə keçirməklə “öldürür”dülər.</p> <p>Bir sözlə, tələbatın artması üçün kifayət qədər ön şərtlər var idi və buna görə də əhaliyə göstərilən internet xidmətlərinin həcmi 26,7 faiz, pulla - 199,1 milyon manata qədər artdı. Təbii ki, xərclər də artıb. Koronavirus pandemiyası ilində əhali internetə 30,4 faizdən çox - 124,2 milyon manat çox pul xərcləyib. Eyni zamanda, son bir ildə əhalinin informasiya və rabitə xərclərinin strukturunda internetin payı 8,5 faizdən 10,5 faizə yüksəldi. İl ərzində vətəndaşlar mobil rabitə üçün 940,3 milyon manat ödəyiblər. Statistikaya görə özəl sektorda gəlirləri 29,4 faiz artan 36 internet provayderi var.</p> <p>Ölkənin bölgələri normal olaraq qlobal şəbəkə ilə əhatə olunsaydı, bu rəqəmlər daha böyük ola bilərdi. Belə çıxır ki, istehlakın artması və xidmət səviyyəsinin artırılması ADSL və adi mis telefon kabelləri ilə işləyən internetin keyfiyyəti ilə uzlaşmır. Təsadüfi deyil ki, distant təhsil problemi ölkədə varlı və aztəminatlı ailələr arasındakı uçurumu daha da dərinləşdirdi. Yoxsul ailələr, bölgə sakinləri və hətta daha çox dağlıq bölgələrdə elektrik və internet problemi ilə əlaqədar distant təhsil o qədər də əlçatan deyil - ya çox zəif internetə malikdirlər, ya da ümumiyyətlə yoxdur.</p> <p><img data-image-id="33510141" class="img-fluid" max-width" src="https://cdn.azerforum.com/2021/09/05/3295030.jpg"/></p> <p>“Azərbaycanda İnternetin mövcudluğu və keyfiyyəti ilə bağlı çətinliklər uzun müddətdir həllini tapmır. Hökumət bunları həll etmək üçün müəyyən səylər göstərsə də, hələ ki, reallaşmayıb. Sözügedən problem, xüsusilə Bakı ətrafındakı ərazilərdə əhalinin az yaşadığı bölgələr və kəndlərdə daha çox aktualdır. Ötən il dövlət paytaxtətrafı internetin keyfiyyətini yaxşılaşdırmaq üçün kifayət qədər böyük vəsait ayırdı, amma hələ ki, heç bir real nəticə müşahidə olunmayıb”, - deyə “Multimedia ”İnformasiya Sistemləri və Texnologiyaları Mərkəzinin direktoru, İKT üzrə ekspert Osman Gündüz AYNA-ya bildirib.</p> <p>Onun sözlərinə görə, qonşu ölkələrin bəzi üstünlükləri var, amma oxşar problemlər onlardan da yan keçmir. Eyni zamanda, bir çox ölkələrdə bu problemin həllinə yanaşmalar, xüsusən də ucqar və az məskunlaşmış bölgələrə münasibətdə əhəmiyyətli dərəcədə dəyişib.</p> <p>Profil nazirliyimiz vəziyyətdən çıxış yolunu dövlət-özəl tərəfdaşlıq çərçivəsində, yəni dövlət təminatçıları “Aztelekom” və ya “Baktelecom”un digər özəl şəbəkə təminatçıları ilə əməkdaşlıq formatı çərçivəsində axtarmaq niyyətindədir: “Qurum artıq bu məsələ ilə bağlı açıqlamalar verib. Lakin bu cür əməkdaşlığın prinsipləri, dövlət və özəl provayderlərin hüquq və vəzifələri hələ açıqlanmayıb. Kəndlərdə yeni magistral şəbəkənin necə qurulacağı, hansı texnologiyalardan istifadə ediləcəyi barədə məlumat verilməyib. Nəhayət ki, bu infrastrukturu kim quracaq və onu idarə edəcək? Eyni zamanda, qonşu ölkələr son vaxtlar əhalisi az olan və ucqar bölgələrdə internetə çıxış probleminə daha innovativ yanaşma nümayiş etdirdilər. Belə ki, Qazaxıstan, Qırğızıstan və Gürcüstan artıq peyklərdən internet alaraq, bu ərazilərdə yüksək keyfiyyətli internetə çıxış problemini həll etmək üçün “StarLink” və “One Web” ilə danışıqlar aparmaq niyyətindədir”.</p> <p>“Starlink” və “OneWeb” dünyanın istənilən nöqtəsində şəbəkəyə çıxış təmin edən qlobal peyk sistemləridir. Ekspert izah edir ki, Azərbaycanda peyk internetinin əldə olunmasının mümkünlüyü ilə bağlı heç bir rəsmi məlumat yoxdur: “Amma “Azərkosmos”un son açıqlamalarına əsasən, bəlkə də belə bir imkanınmız var. Məsələn, bu yaxınlarda “Azərkosmos” kosmik kommersiya fəaliyyəti ilə məşğul olan Çinin tanınmış şirkəti “Satelliteherd” ilə əməkdaşlıq müqaviləsi imzaladı. Ümumiyyətlə, gələcəkdə "Azərkosmos"un da qlobal peyk sistemləri vasitəsi ilə şəbəkəyə çıxış təmin etməsi mümkündür”.</p>
<p><strong>“Bu, “Taliban”ın Avropa dövlətlərinə keçidinin qarşısını almaq üçün lazımdır”</strong></p> <p>“Brüssel Əfqanıstanda hakimiyyətə gələn “Taliban”la danışıqlara başlamalıdır”. AYNA xarici mediaya istinadən bildirir ki, bu sözləri Avropa İttifaqının xarici işlər və təhlükəsizlik siyasəti üzrə ali nümayəndəsi Cozef Borrell deyib.</p> <p>““Taliban” indi bizim üçün qaçılmaz danışıq tərəfinə çevrilir. Kabildə varlığımızı təmin etməliyik və başqa güclər tərəfindən kənara çəkilməməyə çalışmalıyıq”, - diplomat əlavə edib.</p> <p>Onun sözlərinə görə, Əfqanıstanda baş verənlər əfqanlar üçün faciə, Qərb ölkələri üçün uğursuzluq idi: ““Taliblər”in Əfqanıstanda hakimiyyətə gəlməsindən nəticələr çıxarılmalıdır ki, bu, başqa yerlərdə təkrarlanmasın”.</p> <p>Borrelin fikrincə, Kabildə yeni səlahiyyətlilərlə münasibətlərin yaxşılaşdırılması, “Taliban” hökumətinin tanınması hesab edilməməlidir: “Bu, “Taliban”ın Avropa dövlətlərinə keçidinin qarşısını almaq üçün lazımdır”.</p>
<p><strong>Qarşılaşma 1:1 hesabıyla başa çatıb</strong></p> <p>Bu gün DÇ-2022-nin Avropa zonası üzrə seçmə mərhələsində V tura start verilib. AYNA "Qafqazinfo"ya istinadən xəbər verir ki, Azərbaycan millisi də A qrupunda 4-cü matçına çıxıb.</p> <p>Yığmamız səfərdə İrlandiya yığması ilə qarşılaşıb. Dublində keçirilən matçda hesabı millimiz açıb. İlk hissənin son dəqiqəsində Emin Mahmudov fərqlənib. İkinci hissədə təzyiqi artıran meydanb sahibləri matçın 87-ci dəqiqəsində hesabı bərabərləşdirib - 1:1. Oyun bu hesabla da başa çatıb.</p> <p>Qeyd edək ki, Canni de Byazinin yetirmələri keçirdiyi 4 oyundan sonra 1 xalla qrupda sonuncu pillədə qərarlaşıb.</p> <p>DÇ-2022-nin seçmə mərhələsi<br/> V tur, A qrupu<br/> 4 sentyabr</p> <p>20:00. İrlandiya – Azərbaycan - 1:1</p> <p>Qol: Şeyn Daffi, 87 - Emin Mahmudov, 45+1</p> <p>Baş hakim: Cerom Brisar (Fransa)<br/> Dublin. “Aviva” stadionu</p> <p>İrlandiya: 1. Qavin Bazunu, 2. Şeymus Koulman, 4. Şeyn Daffi, 5. Con Eqan, 6. Josh Cullen 7. Mett Doerti, 11. James Mclean, 17. Jayson Molumby, 21. Aaron Connoly, 10. Troy Parrot, 9. Adam İdah</p> <p>Ehtiyat oyunçular: 16. Kuivin Kelleher, 23. Ceyms Talbot, 3. Rayan Manninq, 8. Konor Hurihan, 12. Kallum Robinson, 13. Ceff Hendrik, 14. Alan Braun, 15. Daril Horqan, 18. Cemi Makqrat, 19. Ceyms Kollins, 20. Ronan Kurtis, 22. Andryu Omobamidele</p> <p>Azərbaycan: 1. Şahruddin Məhəmmədəliyev, 18. Anton Krivostsyuk, 4. Höccət Haqverdi, 14. Elvin Bədəlov, 5. Maksim Medvedev, 17. Toral Bayramov,2. Qara Qarayev, 8. Emin Mahmudov, 20. Filip Ozobiç, 7. Namik Ələskərov, 10. Mahir Emreli,</p> <p>Ehtiyat oyunçular: 12. Mehti Cənnətov, 23. Aydın Bayramov, 3. Azər Salahlı, 6. Vüqar Mustafayev, 9. Rüfət Əhmədzadə, 11. Ramil Şeydayev, 13. Abbas Hüseynov, 15. Bəhlul Mustafazadə, 16. Anatoli Nuriyev, 19. Təmkin Xəlilzadə, 21. İsmayıl İbrahimli 22. Rəhim Sadıxov</p>
<p><strong>Bizimkilər səylə nəyi sübut etməyə çalışırlar?</strong></p> <p>Reklam ticarətin mühərrikidir. Bu gün də dəbdə olan şüar o qədər çeynənib ki, hamı bunu bilir - ticarətdən uzaq olanlar da, heç əsl reklamın nə olduğunu bilməyənlər də. Buna baxmayaraq, hiyləgər sahibkarların bu devizi həyatımıza möhkəm girdi və sadə insan reklamlara inanmağa davam edir.</p> <p>Əslində, əksər hallarda reklam qanuni bir fırıldaqdır. Obrazlı desək, reklamla sizə arıq bir yabını köhlən bir ayğır kimi “sırımaq” mümkündür.</p> <p>Təəssüf ki, bunlar reklam biznesinin qanunlarıdır. Ancaq bu sahədə hər şey o qədər də sadə deyil. Bəzən elə bir reklam gözünə sataşır ki, nəinki bu malı almaq, əksinə, ondan imtina etmək istəyirsən.</p> <p>Bəlkə də, kimsə hansısa cümləni şişirtdiyimizi düşünür, amma "polislərin" dediyi kimi, təkzibolunmaz maddi sübutlar göz qabağındadır.</p> <p>Beləliklə, gəlin paytaxtımızın bəzi küçələrində gəzək və bəzi sahibkarlarımızın potensial müştəriləri öz torlarına (sözün yaxşı mənasında) necə cəlb etməyə çalışdıqlarına heyran olaq.</p> <p>Mobil telefon və aksesuar satışı mağazasında bir reklam yerləşdirilib. Mərhum satirik Mixail Zadornovun dediyi kimi: "Hazırsınızmı?" Yaxşı, hazırsınızsa, onda tanış olun: "Adaptir alana nalusnik hediyye".</p> <p><img data-image-id="33508118" class="img-fluid" max-width" src="https://cdn.azerforum.com/2021/09/04/3287635.jpg"/></p> <p>Bu reklam elanı mobil telefon mağazalarının birinin pəncərəsində yer alıb. Ortada latın-rus-Azərbaycan-Türkiyə türkcələrinin bir növ sıx qarışığı var. Və təəccüblüdür ki, bu dillərin heç birində söhbətin nədən getdiyi hər kəsə tam aydın deyil.</p> <p>Belə bir Sovet filmi var: "Kin-dza-dza". Belə ki, bu filmdən olan “çatlanlar” "ku-ku" ifadələri ilə danışsalar da, düşüncələrini və istəklərini sözügedən reklamdan daha açıq şəkildə ifadə edirlər.</p> <p>"Nalusnik" kimi bir "neologizm"in müştəriləri cəlb edəcəyini düşünmürəm. Üstəlik, söhbətin hansı keyfiyyətli maldan getdiyi tam aydın deyilsə.</p> <p>Ancaq "adaptirlar, nalusniklər" kimi xırda şeylər planetar miqyaslı problemlə müqayisədə heç nə deyil. Söhbət koronavirusdan gedir. Və burada da bizim “sənətkarlarımız” bu problemə o qədər məharətlə yanaşdılar ki, COVID-19 virusu Azərbaycan dilini bilsəydi, utandığından özü-özünü məhv edərdi.</p> <p>Bu fotoya baxın. Mən başa düşürəm və bilirəm ki, "immunitet” (toxunulmazlıq) sözünün latın kökləri var, amma bunun Azərbaycan dilində belə bir çirkinliklə təhrif edilməsi ("umlite") başadüşülən deyil. Bəlkə də, deyilişdə qulağa oxşarlıq gəlir, amma yenə də sözlərdə fərq var.</p> <p><img data-image-id="33508119" class="img-fluid" max-width" src="https://cdn.azerforum.com/2021/09/04/3287636.jpg"/></p> <p>Və desert olaraq. Bu yazıdan narazı olanlara, hiddətlənənlərə əsəb gərginliyini aradan qaldırmaq üçün yerli stilistlər təsirli bir üsul təklif edirlər: "kulatka". Həm də ucuz, cəmi 10 manat. Həm də saçınızı qırxacaqlar...</p> <div class="container" no-gutters"> <div class="row"> <div class="col-sm-4" col-xs-6 col-md-3 col-lg-6 p-1"> <a class="fancybox" d-block" data-fancybox="gallery" href="https://cdn.azerforum.com/2021/09/04/3287637.jpg"> <img class="img-fluid" alt="" src="https://cdn.azerforum.com/2021/09/04/3287637.jpg"/> </a> </div> </div> </div>
<p><strong>Jurnalist: “Uzun isrardan sonra paketi əldə etdim və…”</strong></p> <p><strong>Deputat: “Dövlət xəstələrə dərman paketləri ayırırsa, onu çatdırmaq lazımdır”</strong></p> <p>Azərbaycanda koronavirusa yoluxma sayı sürətlə artır. Bundan öncəki ştamlara yoluxanlar arasında əsasən yaşlı və yanaşı xəstəlikləri olan şəxslər xəstəliyi ağır keçirirdisə, artıq gənclər, hətta uşaqlar da bu xəstəliyin qurbanına çevrilir. Virusdan sağalmaq üçün xəstələr minlərlə manat vəsait xərcləməli olurlar. Pandemiyanın ağır şərtləri, sosial-iqtisadi problemlər üzündən böyük məbləğdə borca düşənlər də var.</p> <p>Evdə müalicə olunan koronaviruslu xəstələr üçün pulsuz dərman paketləri nəzərdə tutulsa da, xəstələrin bildirdiklərinə görə, bunu onlara vermirlər. TƏBİB-in “qaynar xətt”inə düşmək mümkün deyil, poliklinikalardan isə bu paketlərin yalnız şəhid və qazi ailələrinə verildiyi bildirilir.</p> <p><img data-image-id="33507709" class="img-fluid" max-width" src="https://cdn.azerforum.com/2021/09/04/3286760.jpg"/></p> <p>COVID-19-a yoluxan jurnalist Zaur Mirzəzadənin AYNA-ya dediyinə görə, infeksiyaya yoluxduqdan sonra ciddi ağrılar hiss etməyə başlayıb: “İlk günlərdə qızdırma kəskin şəkildə artdı. Eyni zamanda bədənimin sümükləri və əzələlərində dözülməz ağrılar meydana gəldi. Paralel olaraq qan təzyiqim oynayırdı - gah qalxır, gah da enirdi, tənzimləmək mümkün olmurdu. Sonrakı mərhələdə həzm pozğunluqları yarandı. Bundan öncə virusa yoluxanlar deyirlər ki, onlar daha asan keçiriblər. Görünən odur ki, “Delta” ştammı daha təhlükəlidir”</p> <blockquote> <p>Jurnalist üç ailə üzvünün virusa yoluxduğunu və 5 min manat müalicə və dərmanlara vəsait sərf etdiklərini bildirir: “Kifayət qədər bahalı müalicədir. TƏBİB-in “qaynar xətti”nə müraciət etdim. Onlar məni poliklinikaya yönəltdilər. Onlardan məni dərman paketi ilə təhciz etmələrini istədim. Əvvəl bildirdilər ki, bu, yalnız şəhid və qazi ailələri üçündür. İsrarımı gördükdən sonra həmin paketi gətirdilər. Olduqca bəsit və ucuz dərmanlardır. Ümumilikdə aptekdən onların hamısını 10 manata əldə etmək olar”.</p> </blockquote> <p>Mirzəzadənin sözlərinə görə, TƏBİB faktiki olaraq insanları yiyəsiz buraxıb: “Testi çox gec götürürlər. Bunun üçün günlərlə gözləməli olursan. Təcili tibbi yardım çağırışlara çox gec cavab verir. Çox bərbad idarəetmə sistemi var. Hansını dindirirsən, digərinin üzərinə atır. Səhiyyə Nazirliyi və TƏBİB arasında siçan-pişik oyunu gedir”.</p> <p><img data-image-id="33507710" class="img-fluid" max-width" src="https://cdn.azerforum.com/2021/01/06/203173.jpg"/></p> <p>Azərbaycan Milli Məclisinin üzvü, tibb elmləri doktoru, professor Asim Mollazadə AYNA-ya şərhində təsdiqləyib ki, vəziyyət kifayət qədər ciddidir: “Yoluxma sayı çoxdur. Hər birimizin ətrafında virusa yoluxmuş doğmalarımız var. Bilirsiniz ki, virusla mübarizədə yeganə yol vaksinasiyadır və bu baxımdan əhalinin peyvəndlənməsi işi sürətlənməlidir. Bu gedişlə yoluxma sayı daha da arta bilər. Eyni zamanda əhalinin evlərdə qeyri-müəyyən vəziyyətdə saxlanılması yolverilməzdir”.</p> <blockquote> <p>Deputat Səhiyyə Nazirliyi və TƏBİB-in səylərinin birləşdirilməsinin vacibliyini vurğulayıb: “Başa düşürük, xəstə çoxdur, çatdırmırlar. Lakin əhali ümidsiz durumdadır. Ölkə səhiyyəsinin idarə edilməsinə cavabdeh qurumların üzərinə böyük məsuliyyət düşür. Koronavirus xəstələri vaxtaşırı nəzarətdə saxlanılmalıdır. Məlumatlar var ki, testlər çox gec götürülür. Bu cür hallara yol verməz olmaz”.</p> </blockquote> <p>Mollazadə TƏBİB-i xəstələrə pulsuz olaraq çatdırılacaq dərmanlar məsələsində məsuliyyətli olmağa çağırıb: “Koronavirus infeksiyası çətin xəstəlikdir və müalicəsi bəzən xeyli vəsait tələb edir. Əgər dövlət koronaviruslu xəstələrə dərman paketləri ayırırsa, onu çatdırmaq lazımdır”.</p>
<p><strong>Əsl qəhrəmanlar heç vaxt qəhrəmanlıqlarını adi məişət səviyyəsinə endirməzlər</strong></p> <p>1992-ci ilin iyulu. Azərbaycanda eyforiya hökm sürür. Çətin iqtisadi şəraitə, cəbhədə qanlı döyüşlərə və insan itkilərinə baxmayaraq, insanların üzlərində təbəssüm var. Azərbaycan qoşunları Ağdərə şəhərini hücumla ələ keçirdi və indi hamı hücumun davamını gözləyir. İndi bizi dayandırmaq olmaz!</p> <p>Və axşam milli televiziyada yol polisinin növbəti reydi haqqında bir süjet göstərirlər. Sərxoş vəziyyətdə idarə etdiyi üçün saxlanılan nəqliyyat vasitəsinin hərbi geyimli sürücüsü qəzəblənir, kameraya fikir vermir: “Nədir? Bir az dincələ bilmərəmmi? MƏN! Ağdərəni alan mən! Qan tökdüm! MƏN! Və sən…!"…</p> <blockquote> <p>2021-ci ilin avqustu. Gövdəli bir kişi klinikanın şüşə qapısını sındırır və növbədə dayananları öz hüquqlarını müdafiə etməyə çağırır. Bu hadisəni əks etdirən videogörüntülərdə onun əsas arqumenti - "Qarabağda qan tökdüm!" olur.</p> </blockquote> <p>Video sosial şəbəkələrin Azərbaycan seqmentində yayılır. Tezliklə, Daxili İşlər Nazirliyindən (DİN) bir bəyanat yayılır və burada videodakı kişinin Qarabağdakı döyüşlərdə ümumiyyətlə iştirak etmədiyi, başqa sözlə, bir fırıldaqçı olduğu xüsusi olaraq vurğulanır. Bütün bunlardan hansı nəticə çıxarmaq olar?</p> <p>Kreativliyin müasir dəbinə uyğun olaraq, DİN-in bəyanatının son abzası ilə başlayaq. Qurum vurğulayır ki, zorakılıq edən müharibə iştirakçısı deyil.</p> <p>Nolsun ki?! Həqiqətən, hər şey bu şəxsin dediyi kimi olsaydı, məsuliyyətdən yaxa qurtarardı? Yəni müharibə iştirakçısı olsa, onun poliklinika qapısını sındırmasına həqiqətən göz yumulacaqdı? Yəqin ki, yox. Çox güman ki, DİN bu dəqiqləşdirmə ilə həmin neqativ hərəkətin müharibə iştirakçıları ilə heç bir əlaqəsinin olmadığını açıq şəkildə göstərir.</p> <p>Ancaq həqiqət budur ki, bəzən özümüz də insanların ən kiçik detallarda belə, öz "qəhrəmanlıq keçmişlərini" necə reklam etdiklərinin, özləri üçün xüsusi imtiyazlar tələb etdiklərinin şahidi olmuşuq. Və "qəhrəmanlıq keçmişi" ifadəsindəki sitatlar cəbhə əsgərlərinə hörmətsizlik kimi qəbul edilməsin. Axı, əsl qəhrəmanlar heç vaxt qəhrəmanlıqlarını adi məişət səviyyəsinə endirməzlər.</p> <p>Lakin 44 günlük müharibədə iştirak edən bir adam, öz şücaətini nümayiş etdirərək, ictimai asayişi pozsa belə, digər vətəndaşlar kimi qanun qarşısında cavab verməlidir. Bütün bu hərbi kampaniya və 3 min şəhid verməkdə məqsəd Azərbaycan dövlətinin qanuni yurisdiksiyasındakı torpaqlarda asayişi bərpa etmək deyildimi? Bəli, hər bir ölkə vətəndaşı tarixi bir qələbə qazanmaq uğrunda həyatını riskə atanlara sonsuz minnətdarlığını bildirir.</p> <blockquote> <p>Vaxtaşırı mediada görünən xəbərlərə görə, dövlət də onları unutmur. Ancaq heç kimin "qırmızı xətti" keçməsinə icazə verilmir. Çünki bu xəttin arxasında anarxiya, xaos və qanunsuzluq dayanır. Və bu, heç də astroloji proqnoz deyil.</p> </blockquote> <p>Yaxın keçmişdə artıq belə bir təcrübə yaşadıq. Əvvəlcə 1992-ci ilin iyulunu xatırladıq. Amma sonra oktyabr gəldi başımıza. Cəbhə xəttində mövqe tutan, lakin sonra cəbhəni boşaldan hərbi hissələrin də qoşulduğu Surət Hüseynovun "qiyamı", Bakıya qarşı yürüşü və nəticədə - ermənilərin hücumu, bizim tərəfimizdən ciddi ərazi və insan itkiləri... Ağdərə üzərində nəzarət də itirildi. Yeri gəlmişkən, separatçıların bayrağı hələ də bu şəhərdə dalğalanır.</p> <p>Yenə yazdır. Amma şükür Allaha, artıq 1992-ci il deyil. Nə təcrübə eynidir, nə də dövlət. Və Azərbaycanda artıq neobolşevizm yaşamayacaq.</p>
<p><strong>Sabiq XİN başçısı: “Qarabağdakı ermənilərinin ümidsizliyi prosesi daha da sürətlənəcək. Çünki hər şey bəllidir, ortadadır”</strong></p> <p>Ermənistanın və Azərbaycanın Rusiya sülhməramlılarının müvəqqəti məsuliyyət zonasında olan Qarabağ bölgəsində hələ də qalan erməni terrorçu-separatçılarının ölkəmizə qarşı təxribatları səngimir. İstər siyasi təxribat olsun, istərsə də hərbi təxribat – düşmən hər ikisinə əl atır. Məsələn, sentyabrın ikisində Qarabağdakı terrorçular “müstəqillik günü” keçirdilər. Düzdür, əvvəlki illərə nisbətən bu ilki “tədbir” sönük, yürüşsüz, paradsız baş tutdu. Eyni zamanda, Ermənistandan “Artsax”a “bayram tədbirinə” rəsmi səviyyədə qatılan da olmadı. Ermənistan rəhbərliyi mənasız, əsassız bəyanatlar verməklə kifayətləndilər. “Müstəqillik günü”nün belə sönük keçməsi İkinci Qarabağ müharibəsində Azərbaycanın qələbəsi, ərazilərinin 80 faizini işğaldan azad etməsi və hər tərəflərində Azərbaycan əsgərlərinin olması ilə izah edilir. “Tədbir” sönük də keçsə, bütün hallarda terrorçular bununla yenidən təxribat etmiş oldular.</p> <p>Separatçıların hərbi təxribatı isə sentyabrın 3-də baş verdi. Belə ki, həmin gün saat 01:00-dan 02:15-dək Rusiya sülhməramlılarının müvəqqəti yerləşdirildiyi Azərbaycan ərazisindəki qanunsuz erməni silahlı dəstələri tərəfindən Şuşa istiqamətində yerləşən bölmələrimizdən birinin mövqeyi intensiv atəşə tutulub. Azərbaycan Müdafiə Nazirliyindən verilən məlumata görə, Azərbaycan Ordusunun hərbi qulluqçularının sayıqlığı və dərhal görülən tədbirlər nəticəsində qarşı tərəf itki verib və susdurulub. Hadisə ilə bağlı Rusiya sülhməramlılarının komandanlığı və Rusiya-Türkiyə Birgə Monitorinq Mərkəzi məlumatlandırılıb.</p> <p>“Bildiririk ki, bu qəbildən olan təxribata cəhd göstərildiyi hallarda tərəfimizdən Azərbaycan Respublikasının qanunları çərçivəsində adekvat tədbirlərin görülməsi bundan sonra da qəti şəkildə təmin olunacaq”, - deyə Müdafiə Nazirliyinin açıqlamasında vurğulanıb.</p> <p>Ermənistan tərəfi isə yekun sülh sazişinin imzalanmasından yayınmaq üçün müxtəlif cür təxribata əl atır: Azərbaycanla sərhəddə atəşkəsi pozur, Naxçıvan atəşə tutulur, ölkə rəsmiləri müxtəlif sərsəm bəyanatlar verirlər. Məsələn, Ermənistanın yeni xarici işlər naziri Ararat Mirzoyan Moskvaya səfəri zamanı rusiyalı həmkarı Sergey Lavrovla görüşündə münaqişənin bitmədiyini, uzunmüddətli həll üçün ATƏT-in Minsk Qrupu çərçivəsində danışıqların başlamalı olduğunu söyləri. Baş nazir Nikol Paşinyan da bu səpkili bəyanatlar verməkdədir.</p> <p><img data-image-id="33504303" class="img-fluid" max-width" src="https://cdn.azerforum.com/2021/09/04/3280231.jpg"/></p> <p>Düşmən tərəfin təxribatları, atdığı addımlar, verdiyi bəyanatlar və Qarabağ ətrafında cərəyan edən proseslərlə bağlı AYNA-nın suallarını sabiq xarici işlər naziri Tofiq Zülfüqarov cavablandırıb. İlk öncə separatçı-terrorçuların Xankəndidə keçirdiyi “müstəqillik günü” təxribatını qiymətləndirən keçmiş nazir deyib ki, bu “tədbir” daha çox yas mərasimini xatırladırdı:</p> <p>- Qarabağda qalan ermənilər və Ermənistan erməniləri yaxşı başa düşürlər ki, artıq onlar işğal etdiklərini, əllərində olanları itiriblər. Anlayırlar ki, “Miatsum” layihəsi, yəni Azərbaycanın ərazilərinin işğalı, Ermənistana birləşdirilməsi planı tam iflasa uğrayıb. Xankəndidəki əhval, sönük “müstəqillik günü”, baş verənlər onu göstərir ki, ermənilər ümidsizlik içərisindədirlər. Mən deməzdim ki, bu hadisə təkcə İkinci Qarabağ müharibəsinin nəticələri ilə bağlıdır. Yada salmalıyıq ki, Birinci Qarabağ müharibəsindən əvvəl, SSRİ vaxtında Qarabağdakı ermənilərin sayı 127 min idi. İkinci Qarabağ müharibəsindən əvvəl Qarabağda 50-60 min erməni qalmışdı. Axırıncı rəqəmlərə görə isə Qarabağda 20-25 min arası erməni yaşayır. Biz görürük ki, ermənilər burada yaşamaq istəmirlər. Hər zaman ümidsizlik içərisində olublar və zaman-zaman Qarabağı tərk ediblər. Absurd “Miatsum” layihəsi isə İkinci Qarabağ müharibəsindən sonra tamamilə məhv oldu.</p> <p>Bunlar anlamalıdırlar ki, qalmaq istəyirlərsə, o zaman Azərbaycanın Konstitusiyasını, bayrağını və ümumiyyətlə, dövlətimizi qəbul etməlidirlər. Kim qalmaq istəyirsə, vətəndaşlığı qəbul etsin, Azərbaycan vətəndaşları ilə eyni şəkildə hüququndan istifadə etsin. Yox, kimsə düşünürsə ki, gəlib Qarabağda ikinci erməni dövləti quracaq, təbii ki, bu mümkün ola bilməz. Hesab edirəm ki, Qarabağdakı ermənilərinin ümidsizliyi prosesi daha da sürətlənəcək. Çünki hər şey bəllidir, ortadadır. Azərbaycandan torpaq almaq, Ermənistana birləşmək layihəsi zibilliyə getdi. Bu ideyanın gələcəyi yoxdur, ola da bilməz. Azərbaycan ərazilərini işğaldan azad edib. Suverenliyini tam bərpa edəcək, buna şübhə yeri qalmayıb. Ermənilər bu faktları dərk edirlər.</p> <p><strong>- Separatçılar Şuşa istiqamətini intensiv atəşə tutublar. Təxribatların sayını çoxaldırlar, hansı ki, Qarabağdakı Rusiya sülhməramlıları da buna göz yumur, görməzdən gəlir. Sizcə, təxribat yönümlü addımların çoxalması nə ilə əlaqədardır?</strong></p> <p>- Biz hesab etməyək ki, ümidsizlik içərisində olan Qarabağ erməniləri bundan sonra təxribatlar törətməyəcəklər. Proseslər heç də hamar getməyəcək. Təxribatların baş verməsi gözləniləndir. Təxribatlar ermənilərin təlaşından irəli gəlir. Qaldı ki, sülhməramlıların davranışına, bunların fəaliyyəti barədə çoxlu tənqidlər səslənir. Düşünürəm ki, Rusiya sülhməramlıları haqlı olaraq tənqid edilir. Sülhməramlılar inteqrasiya prosesində Azərbaycana dəstək göstərməlidirlər. Əgər belə olmasa, təbii ki, sülhməramlıların Qarabağdakı fəaliyyətinə baxılacaq. Ya məhdudiyyət tətbiq ediləcək, ya da fəaliyyətlərinə son qoymaq lazım gələcək.</p> <p>Addımlardan biri ondan ibarət olmalıdır ki, Azərbaycan Laçın dəhlizində dövlət qurumlarımızın fəaliyyətini təmin etməlidir. Çünki məntiqlə sülhməramlıların bölgəyə gəlməsində məqsəd oldan ibarətdir ki, onlar təhlükəsizliyi təmin etməlidirlər. Amma dövlətin qanunlarının icrasını dövlətin qurumları icra etməlidir. Ölkəmizə giriş-çıxış prosedurları hər yerdə olduğu kimi Ermənistanla sərhədə, Laçın dəhlizinə də tətbiq olunmalıdır. Orada gediş-gəliş Azərbaycanın qanunları təmin edilməlidir. İlkin mərhələdə proses bəlkə də Rusiya sülhməramlıları ilə müştərək formada həyata keçirilə bilər.</p> <p><strong>- Ermənistanın yeni XİN başçısı ilə Rusiyanın XİN başçısı arasında Moskvada görüş keçirildi və mətbuat konfransında müəyyən açıqlamalar verildi. Lavrov Ermənistan tərəfinin əsir adlandırdığı şəxslərlə bağlı ilk dəfə idi bildirdi ki, onlar əsir deyil, 10 noyabr Birgə Bəyanatından sonra saxlanılanlardır. Erməni nazir isə Minsk Qrupu üzrə danışıqların bərpasından danışdı. Nazirlərin verdiyi mesajları necə qiymətləndirmək olar?</strong></p> <p>- Rusiyanın XİN-i, Lavrovun nazirliyi dövründə bu məsələlərdə mənfi rol oynaması barədə çox danışılıb. Məsələn, Lavrov Azərbaycanda saxlanılan erməni terrorçuları ilə bağlı düzgün ifadə seçsə də, Ermənistanın XİN başçısına da Minsk Qrupunun fəaliyyəti barədə müsbət fikirlər söyləməyə, geniş çıxış etməyə münbit şərait yaratdı. Mirzoyanın həmsədrlər barədə fikirlərinə isə reaksiya vermədi. Problem ondadır ki, Rusiyanın bu məsələlərdə ikili mövqeyi, ikili rolu var. Birincisi, İkinci Qarabağ müharibəsindən sonra formalaşmış Rusiya-Türkiyə tandemidir. Bu ikilinin fəallığını biz müşahidə edirik. Tez-tez Rusiya və Türkiyə liderləri təmasda olurlar, Qarabağ məsələsini müzakirə edirlər. Eyni zamanda, Ağdamdakı Birgə Monitorinq Mərkəzində fəaliyyət göstərirlər. Demək olar ki, Türkiyənin proseslərdə rolu artıb. Amma Rusiya digər mövqeyi də saxlamaqdadır – Minsk Qrupunun həmsədri rolu gündəmdədir. Təhlil edəndə biz başa düşürük ki, Rusiya Qarabağ məsələsinə ABŞ və Fransa qoşulsun. Lakin Minsk Qrupu ilə bağlı Ermənistan tərəfindən səsləndirilən bəyanatlara Rəsmi Moskva mənfi reaksiya vermir. Görünür, Minsk Qrupundan Türkiyəyə, Azərbaycana qarşı təzyiq aləti kimi istifadə olunur. Moskvada Lavrovla Mirzoyanın mətbuat konfransı bunu göstərdi. Maraqlı məqam ondan ibarətdir ki, bu mövqeyi nümayiş etdirən bəzi etnik səbəblərə görə ermənilərə yaxınlıq edən Sergey Lavrovdur. Minsk Qrupunu dirçəltmək istəyən ilk növbədə Fransa və Ermənistandır. Bu halda rusiyalı nazirin ikili mövqe sərgiləməsi bir çox suallara cavablar yaradır. Artıq nəsə deməyə ehtiyac qalmır.</p>
<p><strong>Hər kəsə diqqətli olmaq tövsiyə olunur və əgər belə problemlə üzləşsəniz...</strong></p> <p>İstehlakçılar xarab məhsul satan marketlərdən şikayətçidirlər. Sosial şəbəkədə yayılan məlumatlara görə, market sahibləri elektrik enerjisinə qənaət etmək üçün gecə saatlarında soyuducuları elektrik enerjisindən ayrırlar. Buna görə də soyuducuda saxlanılan məhsullar xarab olur. Məhsulun vəziyyətindən xəbərsiz olan istehlakçı isə yalnız məhsulu istifadə etdiyində bilir ki, istifadəyə yararsızdır.</p> <p>Azad İstehlakçılar Birliyinin (AİB) sədri Eyyub Hüseynov bu barədə AYNA-nın suallarını cavablandırarkən deyib ki, istənilən ərzaq məhsulu, hətta yararlılıq müddəti keçməsə belə, qısa müddətdə təhlükəli hala çevrilə bilər: “Qida məhsulları tarladan və ya fermadan istehlakçının masasına çatdırılana qədər “soyuq zəncir” prinsipi qorunmalıdır. Hansısa məqamda temperaturun dəyişməsi onu yarasız hala gətirə bilər”.</p> <p><img data-image-id="33503268" class="img-fluid" max-width" src="https://cdn.azerforum.com/2021/02/09/998773.jpg"/></p> <p>“Səhər saatlarında bəzi böyük marketlərə girəndə hiss edirik ki, pis qoxu gəlir. Çünki bəzi market sahibləri gecə saatlarında elektrik enerjisinə qənaət etmək üçün soyuducuları şəbəkədən ayırırlar. Belə olduqda həmin yerdə qidalar təhlükəli hala gəlir. İstehlakçı belə yerlərdən mal almamalıdır, sadəcə baykot olunmalıdır”, - deyə AİB sədri söyləyib.</p> <p>Vaxtı keçmiş və yaxud təhlükəli hala çevrilmiş qidaların geri qaytarılmasına qaldıqda isə Hüseynov söyləyib ki, bu barədə bir neçə qanuni sənədə görə paradoksal vəziyyət yaşanır. Belə ki, “İstehlakçıların hüquqları haqqında” Qanunda, Nazirlər Kabinetinin 94 №-li qərarında, eləcə də “Yeyinti haqqında” Azərbaycan Respublikasının qanununda və digər sənədlərdə yeyinti məhsullarının geri qaytarılması barədə paradoksal vəziyyət mövcuddur. Birində deyilir ki, yararlıq müddəti keçmədiyi halda dəyəri ödənilmiş və dükandan çıxarılmamış ərzaq malını dəyişmək və qaytarmaq olar. Buradan belə anlaşılır ki, istehlakçı dükanın içərisində yağı əritməlidir, onun xarab olub-olmadığını bilməlidir. Digər sənədlərdə isə yararlıq müddəti ötmədiyi halda istehlakçının 14 gün ərzində malı kassa çeki olduğu halda dəyişmək, qaytarmaq hüququ nəzərə alınır.</p> <blockquote> <p>Ekspertin sözlərinə görə, qida məhsullarının hansı temperaturda saxlanılmasına Azərbqaycan Qida Təhlükəsizliyi Agentliyi (AQTA) nəzarət etməlidir: “AQTA tərəfindən vaxtaşırı monitorinqlər keçirməlidir. Bu işdə əhali gərək AQTA-ya köməklik etsin. Bizim dediyimiz kimi şübhəli marketlər varsa, Qida Təhülkəsizliyi Agentliyinin 1003 “qaynar xətt”inə məlumat vermək lazımdır ki, orada monitorinqlər aparılsın. Bu işlərdə gərək vətəndaşlar fəal olsunlar. Harada, necə gəldi, satılan qida məhsullarını almaqdan imtina etməlidirilər”.</p> </blockquote> <p>Mövcud problemlə bağlı AYNA-dan AQTA-ya belə bir sorğu göndərdik: “Sosial şəbəkədə yayılan məlumatlara görə, bəzi market sahibləri elektrik enerjisinə qənaət etmək üçün gecə saatlarında soyducuları elektrik şəbəkəsindən ayırırlar. Nəticədə bəzi məhsullar xarab olur, istehlakçılar aldıqları məhsulu istifadə edərkən bilirlər ki, xarab olub. AQTA bununla bağlı marketlərdə monitorinqlər aparırmı? Sizə bu barədə şikayətlər daxil olurmu? Məhsulu geri qaytarmaqda problem yaşayanlar da olur. Vətəndaşlar bu vəziyyətlə qarşılaşdıqlarında nə etsinlər?”.</p> <p>Agentliyin İnformasiya təminatı və innovativ həllər şöbəsindən sorğumuza cavabda bildirilir ki, mövcud qanunvericiliyə görə, istehlakçıların onlara dəymiş zərərin ödənilməsi və hüquqlarının müdafiəsi üçün səlahiyyətli dövlət orqanlarına və məhkəməyə müraciət etmək hüquqları var: ““İstehlakçıların hüquqlarının müdafiəsi haqqında" Azərbaycan Respublikası Qanununa əsasən, Azərbaycan Respublikası ərazisində istehlakçılar - istehlak etdikləri malların lazımi keyfiyyətdə olmasına, malların təhlükəsizliyinə, qanunvericilikdə nəzərdə tutulan hallarda, lazımi keyfiyyəti olmayan, habelə insanların sağlamlığına, həyatına təhlükəli olan malların (işlərin, xidmətlərin) vurduğu zərərin ödənilməsinə, o cümlədən öz hüquqlarının və qanuni mənafelərinin müdafiəsi üçün səlahiyyətli dövlət orqanlarına və məhkəməyə müraciət etmək hüquqlarına malikdirlər”.</p> <p>Monitorinqlərin aparılması ilə bağlı sualımıza cavabda deyilir ki, “AQTA mütəmadi olaraq, bütün ölkə üzrə qida sahəsində fəaliyyət göstərən digər sahibkarlıq subyektləri ilə yanaşı, ticarət şəbəkələrində də planlı və plandankənar yoxlamalar həyata keçirir”.</p> <blockquote> <p>Həmçinin qeyd edilir ki, müraciətdə bildirilən kimi "bəzi market sahiblərinin elektrik enerjisinə qənaət etmək üçün gecə saatlarında soyducuları elektrik şəbəkəsindən ayırması" ilə bağlı konkret hər hansı vətəndaş şikayəti daxil olmayıb.</p> </blockquote> <p>“Qida məhsullarının təhlükəsizliyinin təmin olunması üçün qida zəncirinin bütün mərhələlərində məhsulların saxlanma şəraitinə, həmçinin temperatur rejiminə əməl olunması zəruri şərtlərdəndir. Bununla bağlı olaraq sahibkarlıq subyektləri məsuliyyət daşıyır. İstehlakçılar bu kimi qanunazidd hallarla rastlaşdıqda və ya hər hansı məlumat əldə etdikdə, Azərbaycan Respublikası Qida Təhlükəsizliyi Agentliyinin “1003-Çağrı Mərkəzi”nə məlumat vermələri xahiş olunur”, - deyə Agentlikdən son olaraq vurğulanır.</p>
<p><strong>Deputat: “ABŞ ehtiyatı əldən verməyəcək, Rusiya ilə açıq qarşıdurmaya getməyəcək”</strong></p> <p><strong>Ekspert: “Ağ Ev Ukraynanı yox, öz maraqlarını düşünür, bu dəfə də belə olacaq”</strong></p> <p>Ukrayna Prezidenti Vladimir Zelenski Vaşinqtona işgüzar səfər edib. Co Baydenlə görüşən Zelenski və xanımının amerikalı həmkarının dəvəti ilə ABŞ-a yollandığı bildirilir.</p> <p>Səfər zamanı Bayden-Zelenski görüşü baş tutub. Ağ Evdə keçirilən görüşdə ABŞ dövlət başçısı Rusiyanın aqressiv davranışı qarşısında Ukraynanın suverenliyi və ərazi bütövlüyünü dəstəklədiyini bir daha vurğulayıb.</p> <p>Görüşdən öncə Bayden jurnalistlərin qarşısına çıxıb. O, Ukraynanın müstəqilliyinin 30-cu ildönümünü qeyd edərkən ABŞ-la münasibətlərin önəmli bir nöqtədə olduğunu bəyan edib.</p> <p>Həmçinin, Bayden Zelenski ilə Ukraynanın Avropaya daha sıx inteqrasiya olunması üçün demokratik islahatları davam etməsini və 60 milyon dollarlıq təhlükəsizlik paketini müzakirə edəcəklərini bildirib. Prezidentlərin görüşü iki saatdan artıq davam edib.</p> <p><img data-image-id="33502585" class="img-fluid" max-width" src="https://cdn.azerforum.com/2020/12/24/70508.jpg"/></p> <p>Milli Məclisin deputatı Aydın Mirzəzadə AYNA-ya açıqlamasında xatırladıb ki, Vaşinqton səfərindən əvvəl Zelenskinin təşəbbüsü ilə Krım Plafforması sammiti keçirilib: “Tədbir ABŞ-ın birbaşa dəstəyi və hətta deyərdim himayəsi altında reallaşdı. Energetika naziri səviyyəsində ABŞ sammitdə iştirak etdi. Ardınca Zelenskinin ən yüksək rəsmi səviyyədə Vaşinqtona dəvət edilməsi göstərir ki, Ağ Ev Ukraynaya siyasi dətək verir. Lakin bu, iqtisadi və hərbi dəstəyə çeviləcəkmi – indidən hər hansı mülahizə yürütmək çətindir”.</p> <blockquote> <p>Deputatın sözlərinə görə, Əfqanıstanda baş verənlər göstərdi ki, digər ölkələrin daxili işlərinə müdaxilə cəhdləri yolverilməzdir: “ABŞ uzun müddət Əfqanıstanda qaldı. Lakin bu ölkəni tərk edəndən sonra “Taliban” yenidən iqtidara gəldi. Bununla da adıçəkilən ölkədə daxili qarşıdurmalar artdı. Azərbaycanın həm ABŞ, həm Rusiya, həm də Ukrayna ilə münasibətləri yüksək səviyyədədir. Bu baxımdan Krım məsələsinin dinc və dialoq yolu ilə həll edilməsində maraqlıyıq. Diolomatik müstəvidən kənar addımlar heç bir region dövləti üçün arzuolunan deyil. Biz təcrübədə bunu dəfələrlə görmüşük”.</p> </blockquote> <p>Mirzəzadə hesab edir ki, ABŞ Ukrayna məsələsinə münasibətdə ehtiyatı əldən verməyəcək: “ABŞ-ın Ukraynanı silahlandıracağı da inandırıcı deyil. Düzdür, bu barədə qəti söz demək mümkün deyil. Lakin ABŞ-ın Rusiya ilə açıq münaqişəyə gedəcəyi ehtimalı azdır. Yəqin ki, sanskiyalar məsələsi gündəmə gətirilə bilər”.</p> <p><img data-image-id="33502586" class="img-fluid" max-width" src="https://cdn.azerforum.com/2021/01/20/716076.jpg"/></p> <p>Respublikaçı Alternativ Partiyasının (ReAL) Siyasi Komitəsinin üzvü Natiq Cəfərli də AYNA-ya şərhində bildirib ki, ABŞ-ın Ukraynaya ciddi dəstəyindən söhbət gedə bilməz: “Rəsmi Kiyev gözləyir ki, ABŞ “Şimal Axını 2” qaz boru xəttinin fəaliyyətinə əngəl olsun. Zelenski bunu açıq şəkildə dilə gətirir və Qərbdən bununla bağlı ciddi gözləntilərinin olduğunu deyir. Bu isə praktik olaraq mümkün deyil. Əvvəla ona görə ki, bu layihədə əsas tərəflərdən biri Almaniyadır. Və onlar heç bir halda imkan verməzlər ki, “Şimal Axını 2” qaz boru xəttinin fəaliyyəti dayandırısın. Bu kəmərə görə, Ukrayna ildə təxminən 3 milyard dollar itirir. Mümkündür ki, ABŞ bu ziyanın bir hissəsini kompensasiya olaraq Ukraynaya ödəsin”.</p> <p>Cəfərlinin fikrincə, Ukraynanın NATO-ya üzvlüyü məsələsinin də yaxın müddətdə baş verəcəyi inandırıcı deyil: “Ukraynanin daha bir tələbi qısa müddətdə NATO-ya üzvlüklə bağlıdır. Rusiya isə bu məsələdə israr edir, postsovet məkanında hər hansı dövlətin Şimali Atlantika Alyansında təmsilçiliyinə imkan vermək istəmir. Ukrayna da başa düşür ki, bu quruma üzv olarsa, Kremllə bütün bağlarını qıracaq”.</p> <blockquote> <p>“Görünən odur ki, ABŞ və Qərb bu məsələdə tələsmir. Ukrayna amilindən hələ uzun müddət Moskvaya qarşı istifadə etməyə çalışır. Bayden-Zelenski görüşündə bununla bağlı hər hansı razılaşmanın olduğunu da güman etmirəm”, - deyə həmsöhbətimiz vurğulayıb.</p> </blockquote> <p>ReAL təmsilçisi sonda qeyd edib ki, Zelenskinin Vaşinqton səfəri ABŞ-ın Ukraynaya siyasi dəstəyinin davamı olacaq: “ABŞ-ın, o cümlədən Qərbin Ukraynanı silahlandıracağı ehtimalı azdır. Bu səfər daha çox siyasi dəstəyi özündə ehtiva edəcək. Rusiyaya qarşı müəyyən sanksiyalar məsələsi də gündəmə gətirilə bilər. Lakin bu səfərdən ciddi gözləntilər yoxdur. ABŞ Əfqanıstanda olduğu kimi, Ukraynada da sona qədər müttəfiqlərini müdafə etməyəcək. Öz maraqları isə bu dəfə də ön planda olacaq”.</p>
<p><strong>Vətəndaş: “Onlayn növbə götürmüşəm, amma poliklinikanın qarşısındakı izdihamdan, hay-küyün əlindən dəfələrlə geri qayıtmalı olmuşam, peyvənd oluna bilmirəm”</strong></p> <p><strong>Həkim: “Məsul qurumlar işinin öhdəsindən gələ bilmədi, bu yöndə kifayət qədər təkilflər verdik, amma həmin təkliflərə məhəl qoyulmadı və indi onun acısını yaşayırıq”</strong></p> <p>COVID-19 pasportuna sahib olmaq üçün vaksinasiya prosesindən keçmək tələb olunur. Bu tələb olmasaydı, bəlkə də insanlar peyvəndə bu qədər maraq göstərməzdilər. Beş aydır ki, başlayan vaksinasiya prosesi son günlərdəki qədər ajiotaj yaratmamışdı. Bir çox xəstəxanaların, poliklinikaların qarşısında iynə atsan, yerə düşməz.</p> <p>Nəticədə xaotik vəziyyət yaranır. Bir tərəfdən insanları vaksinasiyaya dəvət edirlər, digər tərəfdən isə onların peyvənd olunma haqqını təmin edə bilmirlər.</p> <p>Hazırda vaksinasiya prosesinə mane olan ən böyük səbəb yerlərdəki sıxlıqdır. Bu sıxlığı aradan qaldırmaq üçün elektron sistem – “randevu.its.gov.az” adlı sayt mövcuddur ki, adından da göründüyü kimi onlayn nöbvə götürülməsini təmin etməli, növbənin götürüldüyü tibb müəssisəsində də peyvəndlənmə prosesi bu növbə əsasında təşkil olunmalıdır. Amma...</p> <p>Bəs, aidiyyəti qurumlar niyə bu vəziyyətə hazır deyil, niyə vaxtında tədbir görməyiblər? Nazirlər Kabinetinin məlum qərarından bir aydan çox vaxt keçib, bu müddət ərzində ölkə üzrə sürətli vaksinasiya üçün bir sıra addımlar atmaq olardı.</p> <p>AYNA problemə aydınlıq gətirməyə çalışıb.</p> <p>Tibbi Ərazi Bölmələrini İdarəetmə Birliyinin (TƏBİB) mətbuat xidmətindən sorğumuza belə cavab aldıq: ““Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq Bakı şəhəri üzrə poliklinikalarda vaksinasiya Səhiyyə Nazirliyinin kordinasiyasında həyata keçirilir. Bakı şəhəri üzrə TƏBİB stasionar müalicə və səyyar vaksinasiyaya məsuldur”.</p> <blockquote> <p>Səhiyyə Nazirliyi isə sıxlığın səbəbini insanların onlayn növbə götürmədən yaxınlaşması ilə əlaqələndirir.</p> </blockquote> <p>Lakin məsələ günahı sıravi vətəndaşların üzərinə atacaq qədər sadə deyil. Çünki sözügedən saytda qeydiyyatdan keçib növbə götürmək olduqca müşkülə çevrilib.</p> <p>Heç bir texniki problemlə üzləşmədən onlayn qeydiyyatdan keçərək növbə götürən vətəndaşlardan biri Rəmziyyə Süleymanovadır. Amma deyir ki, növbəni götürüb poliklinikaya yaxınlaşsa da, istəyinə nail ola bilməyib: “Şəkərli diabet xəstəsiyəm. İkinci qrup şəkərli diabet oluğum üçün həkim vaksinasiya olunmağımı məsləhət gördü. Mən də senytabrın 1-dən başlayacaq məhdudiyyətlərə görə vaksin olunmaq istədim. Növbələrdə baş verən izdiham, səs-küy əlindən neçə dəfə geri qayıtmalı olmuşam. Operativ Qərargah özü insanların vaksinasiyadan yayındığı ilə bağlı giley-güzar edirdi, indi bütün insanlar vaksin olunmağa çalışır, lakin bunun üçün aidiyyəti qurumlar normal şərait yarada bilmir”.</p> <p><img data-image-id="33501350" class="img-fluid" max-width" src="https://cdn.azerforum.com/2021/07/02/2485967.jpg"/></p> <p>Həkim Vasif İsmayıl da AYNA-ya şərhində vaksinasiya ilə bağlı xəstəxanalarda yaşanan vəziyyətin heç də ürəkaçan olmadığını bildirib: “Aidiyyəti qurumlar buna öncədən hazırlıqlı olmalı idi. Vaksinasiyaya cəlb olunan yerlərin sayı artırılmalı idi. Bir neçə səyyar peyvəndlənmə məntəqələrini də görmüşəm. Məsələn “İnşaatçılar”da səyyar peyvəndlənməni həyata keçirirlər. Bu cür səyyar peyvəndlənmənin sayını artırmaq olardı”.</p> <p>Öz növbəsində həkim-radioloq Aydın Əliyev də əməkdaşımızla söhbətində peyvəndləmə prosesinin düzgün təşkil olunmadığını söyləyib: “Məsul qurumlar işinin öhdəsindən gələ bilmədi. Əgər bacarsaydılar, bu işin öhdəsindən də gələ bilərdilər, görünür ki, bacarmadılar. Bu yöndə kifayət qədər təkilflər verdik, amma həmin təkliflərə məhəl qoyulmadı. İndi isə onun acısını yaşayırıq”.</p> <p><img data-image-id="33501351" class="img-fluid" max-width" src="https://cdn.azerforum.com/2021/08/19/3078962.jpg"/></p> <p>Həkimin sözlərinə görə, peyvənd hələ ölkəyə gətirilməzdən qabaq bu yöndə güclü maarifləndirmə işləri aparılmalı idi: “Amma aparılmadı. Təbliğat-təşviqat, insanlarla bilgiləndirmə işləri aparılmalı, tanınmış şəxslərin, aktroyların bununla bağlı videoçarxları hazırlanmalı - bu cür işlər təşkil olunmalı idi. Məşhur insanlar hamının gözünün qarşısında peyvəndlənməklə vaksinasiya təbliğ olunmalı idi. Təəssüf ki, biz bütün bunları görə bilmədik”.</p> <blockquote> <p>“İndi isə peyvəndə görə qadağa variantını tətbiq etməyə başlayıblar. İnsanlar kim peyvənd olunmasa, iş yerləri, təhsil müəssisələri, ictimai iaşə obyektlərinə buraxılmayacaqları qadağasını eşidirlər. Bizim millət isə hər bir işdə çıxış yolu tapdığı kimi bunda da çıxış yolları tapmağı bacarır. İnsanlar indi əks göstərişlə bağlı sertifikat alırlar ki, onlara peyvənd vurdurmaq olmaz. Bəzi insanlar pul müqabilində COVID-19 pasportu əldə edirlər”, - deyə Əliyev vurğulayıb.</p> </blockquote> <p>Həmsöhbətimiz minlərlə insanın saxta COVID-19 pasportu əldə etdiyini də qeyd edib: “Bilirsiniz, bu, nə deməkdir? Bu, o deməkdir ki, onminlərlə doza peyvənd çölə atılır. Çünki vurulmayan peyvəndlər ləğv olunmalıdır. Hazırda dünyada peyvənd çatışmazlığı yaşayan ölkələr var. Bunun fonunda bu cür halların baş verməsi nə dərəcədə düzgündür? Əminəm ki, bunu edən insanlar mahiyyəti anlamırlar. Həmin insanlar kifayət qədər məlumatlandırılsa, bu yola əl atmazlar. Qadağalarla nəyəsə nail olmaq çox çətin olacaq”.</p> <p>Xatırladaq ki, Baş nazir Əli Əsədovun imzaladığı qərara görə, ictimai iaşə müəssisələrində, mehmanxanalarda və iri ticarət mərkəzlərində göstərilən xidmətlərdən yaşı 18-dən yuxarı olan şəxslər yalnız COVID-19 pasportu olduğu halda istifadə edə biləcəklər. Qərarda bildirilir ki, bu il sentyabrın 1-dən etibarən dövlət orqanları əməkdaşlarının, bütün tibb və əczaçılıq müəssisələrinin və bütün elm və təhsil müəssisələri işçilərinin azı 80 faizinin COVID-19-a qarşı birinci doza, 1 oktyabr tarixindən etibarən isə ikinci doza peyvənd olunması və ya COVID-ə qarşı immunitet sertifikatı tələb edilir. Bundan başqa, ali və orta-ixtisas təhsili müəssisəsində təhsil alan, yaşı 18-dən yuxarı bütün şəxslərdən COVID-19 pasportu tələb olunacaq.</p>
<p><strong>Hindu-Kaş dağ silsiləsində yerləşən Pəncşir partisan hərəkatı ümçün idealdır</strong></p> <p>Əfqanıstanın Pəncşir əyalətinin coğrafi mövqeyi və landşaft xüsusiyyətləri burada “Taliban”a qarşı cəmlənmiş müqavimət qüvvələrinin əsas üstünlüklərindən biridir. AYNA xəbər verir ki, bu barədə “The Washington Post” yazıb.</p> <p>Qəzetin qeyd etdiyinə görə, “taliblərə” qarşı üsyan edən Şimal İttifaqının hazırkı lideri Əhməd Məsud 1980-ci illərdə Qərb dövlətlərinin dəstəyi ilə Sovet Ordusu ilə döyüşən atası, səhra komandiri Əhməd Şah Məsuddan fərqli olaraq beynəlxalq dəstək ala bilmir. Amma oğul Məsud qonşu Tacikistandan təchizat yolunu itirsə də, üsyançıların hələ də uğur qazanma şansı var. Çünki Pəncşirin dağlıq olması üsyançılar üçün əlverişlidir.</p> <p>Pancşir Hindu-Kuş dağ silsiləsində yerləşir və ora çoxlu dərələrlə, qayalıqlarla seçilir. “The Washington Post” yazır ki, bu, üsyançıların “Taliban”a tələ qurmasına və onlar üçün bir növ təbii qala yaratmasına imkan verən partizan müharibəsi üçün ideal bir yerdir.</p> <p>Yəni ki, bölgənin coğrafiyası Şimal İttifaqının qələbələrini təmin edib. Milli Müqavimət Cəbhəsi də adlandırılan Şimal İttifaqının Xarici Əlaqələr Şöbəsinin rəisi Əli Nazəri qəzetə verdiyi müsahibədə xatırladıb ki, 1980-ci illərdə Sovet qoşunları bu əyaləti ələ keçirmək üçün doqquz dəfə cəhd etsələr də, hər dəfə geri oturdulub: “1990 -cı illərdə “Taliban” da Pəncşiri almağa cəhd göstərdi. Reaktiv təyyarələr və raket qurğuları baxımından ciddi bir hərbi üstünlüyə baxmayaraq, bunu bacarmadı”.</p> <p>Bu günlərdə məlum olub ki, “Taliban”ın Pəncşirə gecə hücumu uğursuz alınıb. Qeyd olunub ki, “Taliban” əyalətə üç istiqamətdən hücum etsə də, heç birində uğur qazana bilməyib. Eyni zamanda, səhərə qədər müqavimət döyüşçüləri “taliblər”in ələ keçirdikləri bir neçə mövqeyi geri ala biliblər.</p> <p>Qeyd edək ki, sentyabrın 2-də “Taliban” üsyançıların lideri Əhməd Məsudla danışıqların nəticəsiz qalmasından sonra Pəncşir əyalətində müqavimət qüvvələrinə qarşı hücuma keçmək qərarına gəlib. “Taliban” əyalətin əsas yoluna çatdıqlarını və 11 nəzarət məntəqəsini ələ keçirdiklərini açıqlamışdı.</p>
<p><strong>Ceyhun Məmmədov: “Ukrayna xalqının azərbaycanlılara, ümumiyyətlə, türklərə münasibəti çox yaxşıdır, bizə qarşı sevgi var”</strong></p> <p>Ukraynadakı Azərbaycan diasporunun fəaliyyətinin birləşdirilməsi və təkmilləşdirilməsi məqsədilə yaradılan Ukrayna Azərbaycanlıları Radası (UAR) bu ölkədə yaşayan azərbaycanlıların problemlərinin həllinə yardım etməklə yanaşı, soydaşlarımızın birliyinin təmin olunması, təşkilatların fəaliyyətinin koordinasiya edilməsi istiqamətində addımlar atır. Rada rəhbərliyi azərbaycanlılarla görüşlər keçirir, onların məsələlərini Azərbaycanın Ukraynadakı Səfirliyinə çatdırır, həllinə dəstəkçi olur.</p> <p>Qeyd edək ki, Ukrayna Azərbaycanlıları Birləşmiş Diasporunun (UABD) sədri Hikmət Cavadov və Kiyev Azərbaycanlıları Konqresinin (KAK) sədri Oleq Krapivin həmsədri olduği UAR 2018-ci ildə təsis edilib. Bir neçə diaspor təşkilatı Radada birləşib. UAR-ın məqsədlərindən biri də Ukraynadakı bütün təşkilatların birlik nümayiş etdirməsinə nail olmaqdır.</p> <p>Azərbaycana yaxın və dost olan Ukraynada azərbaycanlıların vəziyyəti, yaşayışları, cəmiyyətə inteqrasiyası, UAR-ın nələrlə məşğul olduğu barədə AYNA-nın suallarını UAR-ın Baş katibi Ceyhun Məmmədov cavablandırıb. Xatırladıb ki, Azərbaycan müstəqilliyini bərpa etdikdən sonra diaspor fəaliyyətinə başladığı ilk ölkələrdən biri, bəlkə də birincisi məhz Ukraynadır:</p> <p><img data-image-id="33497147" class="img-fluid" max-width" src="https://cdn.azerforum.com/2021/09/03/3265200.jpg"/></p> <p>- İlk diaspor təşkilatımız Ukraynada fəaliyyətə başlayıb. Hətta Azərbaycan Diasporla İş üzrə Dövlət Komitəsinin ilk sədri Nazim İbrahimov Ukraynada diaspor sədri, sonradan səfir olub. Deməyim odur ki, Ukraynadakı diaspor təşkilatlarımız köklü qurumlardır. Ukraynada Azərbaycan diasporu kifayət qədər dayaqlara malikdir. Mənfi cəhət ondan ibarətdir ki, diasporda bölünmə çoxdur, xeyli sayda təşkilatlar var. Həmin təşkilatların əksəriyyəti fəaliyyətsizdir. Bunun obyektiv və subyektiv səbəbləri var. Azərbaycan Diasporla İş üzrə Dövlət Komitəsinin yeni sədri Fuad Muradovun innovativ addımları oldu. Ən birincisi, bütün dünyada azərbaycanlıların koordinasiya şuralarının yaranması addımıdır. Məsələn, Ukraynaya gəldi, özü tədbirlərdə iştirak etdi, görüşlər keçirdi və təklif etdi ki, birlik olsun. Demək olar ki, bu ideyaya nail olundu. Bu gün Azərbaycanın səhv etmirəmsə, dünyada 27 ölkəni əhatə edən 11 koordinasiya şurası var. Bu isə əlbəttə, böyük qüvvədir. Eyni zamanda, Diaspor Komitəsi ilk dəfədir ki, keçirilən layihələrə maliyyə vəsaiti ayırmağa başlayıb. Təşkilatlar layihəsini təqdim edir, bəlli, nizamlı işlər görülür, tədbirlər keçirilir. Həmçinin diaspor təşkilatlarına media dəstəyi göstərilir.</p> <p>Eyni zamanda, Birinci vitse-prezident Mehriban xanım Əliyevanın təşəbbüsü ilə ölkələrdə “Qarabağ məktəbi” açılır ki, Ukraynada da belə məktəblər var. Həmin məktəblər həftəsonu məktəbləridir. O məktəblərdə azərbaycanlıların uşaqları yığışırlar, Azərbaycan dilində danışırlar, bir-biriləri ilə ünsiyyətdə olurlar. Məktəblərdə Azərbaycanın ədəbiyyatı, tarixi, mədəniyyəti Azərbaycan kökənli uşaqlara aşılanır, öyrədilir. Bu, çox vacib məsələ idi ki, sistemli şəkildə həyata keçirilir. Ümumilikdə, koordinasiya şuralarının yaradılması, “Qarabağ məktəbi”, “Azərbaycan evi” kimi layihələr diaspor nümayəndələrində, xaricdəki azərbaycanlılarda özlərinə bir inam yaratmış oldu. Artıq soydaşlarımız hiss edirlər ki, dövlətləri onların arxasındadır, dövlətin nəzərindədirlər. Bu, böyük stimuldur. Biz bunu yüksək qiymətləndiririk.</p> <p>Yeri gəlmişkən, onu da qeyd edim ki, diaspor təşkilatları pandemiya dövründə, sərhədlər bağlı olanda buradakı azərbaycanlılara əlindən gələn dəstəyi nümayiş etdi. Soydaşlarımızın, pandemiya səbəbindən burada qalmış azərbaycanlıların, tələbələrin bütün problemlərinin həllində əlimizdən gələni etdik. Evsiz qalan azərbaycanlılara qalmaq şəraiti yaradıldı, onlara ərzaq yardımları edildi və s.</p> <p><strong>-</strong> <strong>Diaspor</strong><strong>u</strong><strong>n işinin effektiv olmasının bir yanı da sizdən</strong> <strong>-</strong> <strong>diaspor nümayəndələrindən asılı deyilmi?</strong></p> <p>- Əlbəttə, bizdən çox şey asılıdır. Komitə addımlarını atır, müəyyən çərçivədə hərəkət planı var. Yerlərdə bu planlar necə yerinə yetiriləcək - bu, artıq azərbaycanlılardan, diaspor təşkilatlarından asılıdır.</p> <p><strong>-</strong> <strong>Məsələn, siz hazırda hansı fəaliyyət</strong><strong>lə məşğulsunuz</strong><strong>?</strong></p> <p>- Mən iyul ayından etibarən UAR-da baş katib vəzifəsini yerinə yetirirəm. Təşkilatın fəaliyyət planı var, Nizamnaməmizə uyğun həmin planlar istiqamətində işimi görürəm. İstəyirik ki, Ukraynanın regionlarında olan diaspor təşkilatlarını da UAR-a cəlb edək, birlikdə olaq. Bəlli proqramlar üzrə işləyək. Belə bir ideya irəli sürmüşəm ki, Ukraynadakı azərbaycanlı iş adamlarını, tələbələri, sadə soydaşlarımızı Türk Şurasında təmsil olunan insanları İsmayıl bəy Qaspıralının “Sözdə, işdə, fikirdə birlik” şüarı ətrafında cəmləyək, bu şüarla fəaliyyət göstərək. Fəaliyyətimi bu istiqamətdə qurmuşam ki, azərbaycanlılar, sözdə də, fikirdə də, işdə də bir olmalıdırlar. Hamımızın fərqli düşüncələri, yanaşmaları ola bilər. Fərqli şeylərdən xoşumuz gələ bilər, zövqümüz müxtəlif olar. Amma Azərbaycan üçün, Türk Şurası üçün şəxsi maraqlarımızı kənara qoymalıyıq. Milli məsələlərdə birlik olmağı bacarmalıyıq. Bunu etməliyik, başqa yolumuz yoxdur.</p> <p><strong>- Ukraynalıların azərbaycanlılara münasibəti necədir?</strong></p> <p>- Ukrayna xalqının azərbaycanlılara, ümumiyyətlə, türklərə münasibəti çox yaxşıdır. Müşahidələrim deməyə əsas verir ki, bizə qarşı sevgi var. Əlbəttə, bunun səbəbləri var. İlk öncə deyim ki, SSRİ dövründə ukraynalılarla azərbaycanlılar isti münasibətdə olublar ki, bu münasibət indi də davam edir. Müəyyən şəxsiyyətlərimiz var, onlara xoş münasibətdən də qaynaqlanan məqamlar təsirlidir. Məsələn, Ümummilli lider Heydər Əliyevin vaxtilə Ukrayna ilə bağlı addımları olub ki, ukraynalıların ona rəğbəti azərbaycanlılara rəğbətə də təsir edir. Müslüm Maqomayevə böyük sevgi bəsləyirlər, o da böyük azərbaycanlı şəxsiyyətlərdən biridir.</p> <p>Ən önəmli məsələlərdən biri də Azərbaycanın da yaşamış olduğu problemi Ukraynanın da yaşamasıdır - ərazilərinin işğalı. Bizim xalqlarımızı birləşdirən məqamlardan biri də məhz budur. İkinci Qarabağ müharibəsi, Azərbaycan xalqının, ordusunun ərazilərini işğaldan azad etmək yolunda atdığı addımlar Ukrayna xalqına bir stimul verdi. Ərazi bütövlüyümüzün təmin olunması ukraynalıları sevindirir, onlara stimul aşılayır. Ukrayna xalqı deyir ki, Azərbaycanın qələbəsindən nələrsə öyrənməliyik, əraziləri azad etməliyik. Onlar hesab edirlər ki, demək, işğal olunan əraziləri qaytarmaq olar, bu, mümkündür. Burada bizə qarşı bir sevgi, simpatiya var. Biz bu simpatiyanı 44 günlük Vətən müharibəsində də müşahidə etdik. İstər dövlət səviyyəsində, istər ictimai səviyyədə Ukrayna Azərbaycanın yanında oldu.</p> <p>Daha bir faktor isə odur ki, biz azərbaycanlılar dostluq qurmağı bacarırıq. İndi diaspor mədəniyyəti formalaşmaqdadır. İstəyirik, elə fəaliyyət göstərək ki, yerli xalq bizə qarşı yüksək münasibətdə olsun. Eyni zamanda, ictimai-siyasi şəxslərlə əlaqələr qururuq. Deputat dostlar var ki, Azərbaycana münasibəti pozitivdir. Elə deputatlar var ki, Ali Radada dəfələrlə Xocalı soyqırımının tanınması layihəsi ilə çıxış ediblər. Təəssüf ki, bədnam qonşularımız olan ermənilərin burada təmsilçiləri var, yüksək vəzifədə olanlar var, onlar belə təşəbbüslərin keçməsinə əngəl yarada bilirlər. Diaspor olaraq bizim hədəflərimizdən biri də oldur ki, Ukraynanın Xocalı soyqırımını tanımasına nail ola bilək.</p> <p><strong>-</strong> <strong>Sizin də dediyiniz kimi, ermənilər hər bir ölkədə dövlət vəzifələrindədirlər, parlamentlərdədirlər. Məsələn, bu yaxınlara qədər Ukraynanın ən güclü nazirlərindən olan Arsen Avakov da erməni əsilli idi. Ali Radada da erməni deputatlar yetərincədir. Amma azərbaycanlıları belə əhəmiyyətli postlarda görə bilmirik. Bunun səbəbi nədir?</strong></p> <p>- Təbii ki, Ukrayna-Azərbaycan münasibətləri yüksək inkişaf mərhələsindədir. Bir neçə gün əvvəl Ukrayna Prezidenti Vladimir Zelenski ölkənin xarici siyasət prioritetlərini açıqladı. Orada əsas düşmən Rusiya göstərildi. Dostlar, tərəfdaş ölkələr arasında isə ilk sıralarda Azərbaycan gəlir. Ukrayna xalqı da Azərbaycanı sevir, dəstəkləyir. Ona görə də, demək olmaz ki, kimsə azərbaycanlıların yüksək dövlət postlarında təmsilçiliyinə əngəl yaradır. Azərbaycanlıların Ukraynada siyasətlə məşğul olmasının önünü kəsən yoxdur. Sadəcə bizim soydaşlarımız, Ukraynada yaşayanlar buraya daha çox biznes məqsədi ilə gəlirlər, pul qazanmaq istəyirlər. Ukraynada siyasətlə məşğul olmaq böyük gəlir gətirmir. Siyasət gəlirsiz sahə olduğu üçün azərbaycanlılar buna meyl etmirlər. Ukraynada dövlət vəzifələrində olmamağımız bu sahəyə diqqət yetirməməkdən irəli gəlir. Əlbəttə, bizim insanlar çox bacarıqlıdırlar. İnanıram ki, siyasi sahədə də uğur qazana biləcək azərbaycanlılarımız var, sayları da az deyil. Sadəcə siyasətlə məşğul olmayublar, daha çox biznesə yönləniblər.</p> <p><strong>-</strong> <strong>Hər halda siyasətlə məşğul olmaq istəyən azərbaycanlı olmamış deyil. Olmazmı ki, həmin bizneslə məşğul olan insanlar, iş adamlarımız milli təəssübkeşlik naminə siyasətlə məşğul olmaq istəyənə dəstək göstərsinlər, yardım etsinlər. Beləliklə Ukraynanın dövlət postlarında azərbaycanlılar da təmsil olunsun və onlar haqqımızın müdafiəsində yanımızda olsunlar?</strong></p> <p>- Əlbəttə, bu, lazımdır. Bizim təşkilatın fəaliyyət istiqamətlərindən biri də məhz bununla bağlıdır. Bu işi təşviq etmək, iş adamlarını siyasətlə məşğul olanlara yardıma səsləmək lazımdır. İnanıram ki, biznesmenlərimizin içərisindən bu işə yardım etmək istəyənlər olacaq. Bizim qeyrətli, vətənpərvər insanlarımız, iş adamlarımız var. Sadəcə indiyədək görünür ki, təşviqat, təbliğat zəif gedib. İnanıram ki, diasporumuzun birliyi sayəsində bu işlərə nail ola biləcəyik. Mən “sözdə, fikirdə, əməldə birlik” şüarını deyəndə belə halları nəzərdə tuturam.</p>
<p><strong>Halbuki bu, insanlar qarşısında zərurət yox, seçim olmalıdır</strong></p> <p>Son illərdə abituriyentlərin ixtisas seçimini bu işlə məşğul olanlara həvalə etməsi çoxalıb, daha dəqiq desək, adi hal alıb. Bu hal daha çox əvvəllər az bal toplayanlar və rayonlarda yaşayanlar arasında müşahidə olunurdu. Onlar hansısa kiçik bir səhv və ya diqqətsizliklə ali təhsil almaqdan məhrum olmamaq üçün müəllimlərə və ya ixtisas seçimində abituriyentlərə kömək edən şəxslərə üz tuturdular.</p> <p>Bu, müəyyən qədər başadüşülən idi. Çünki adətən həmin abituriyentlər hansısa ixtisası hədəfləməyən, sadəcə topladığı balı qiymətləndirərək ali təhsil almaq şansından istifadə etmək istəyənlər idi. Eyni zamanda internet və kompüter problemi yaşayanlar da buna məcbur olurdular.</p> <p>Bu gün isə 500-600-dən yuxarı bal toplayan şagirdlərin də ixtisas seçimini mütəxəssislə etdiyini görürük. Düzdür, yüksək balı daha yaxşı qiymətləndirmək və ən uyğun universitetdə və ixtisasda təhsil almaq istəyi ilə müəyyən məsləhətləşmələr etmək təbii haldır. Lakin maraqlıdır ki, repetitor yanına hazırlığa getmək kimi, ixtisas seçimini mütəxəssislə etmək də dəb halını alır.</p> <p>Bəs, görəsən, nə istədiyini bilməmək, yaxud da ixtisas və universitetlərin perspektivi barədə vahid və dolğun bir bazanın olmamasında bunun payı nə qədərdir?</p> <p><img data-image-id="33496047" class="img-fluid" max-width" src="https://cdn.azerforum.com/2021/08/27/3183137.jpg"/></p> <p>AYNA-nın suallarını cavablandıran təhsil eksperti Qoşqar Məhərrəmov deyib ki, vahid və dolğun məlumat bazasının olmaması ixtisas seçimi ilə bağlı sözügedən məsələni zəruri hala çevirir: “Əvvəllər rayonlarda internet, kompüter, ixtisas haqda məlumatsızlıq, kodlaşdırmanı səhv etmə qayğısı ilə insanlar bu işi bilənlərə müraciət edirdilər. Həmin şəxslər də təhsil şöbəsinin və ya Dövlət İmtahan Mərkəzinin hansısa işçisi olurdu və ofis götürərək bu işi 10-20 manata görürdülər. Mərkəzlərdə isə söhbət 100 manat və daha artıq məbləğdən gedir”.</p> <p>“Abituriyentlər universitetlər və ixtisaslar haqqında məlumatlı deyillər. Hansı ixtisaslarda hansı fənlər keçiriləcək, həmin ixtisasa yiyələnənlər hansı işləri görür və s. haqda məlumata sahib deyillər. Bu kimi məsələlərə görə ixtisas seçimində kariyera mütəxəssisinə getmək bir zərurət yaradır, eyni zamanda da dəb halını alır”, - deyə həmsöhbətimiz bildirib.</p> <p>Ekspert hesab edir ki, universitetlər orta məktəblərdə özlərini tanıtmalı, məktəblər müəllimlərindən birini karyera mütəxəssisi kimi yetişdirməlidir ki, bu problem müəyyən qədər azalsın: “Ölkəmizdə artıq elə bir stiuasiya yaşanır ki, necə repetitorluq zərurət olur, eynilə ixtisas seçimində bu işi bilənlərə müraciət etmək zərurət olur. Zərurət yarandığında da təbii ki, ağıllı adamlar bunu biznesə çevirirlər. Çünki biznes ehtiyacdan doğur. Bu işlə məşğul olanları mən qınamıram. Amma bu, şagirdlərin qarşısında bir zərurət yox, seçim olmalıdır”</p> <blockquote> <p>“Konsultasiya dünyanın hər yerində verilən bir xidmətdir. Ancaq şagirdlər kütləvi şəkildə buna ehtiyac duyursa, deməli, orta məktəblərimizdə ixtisaslarla bağlı məlumat zəifdir. Karyera planlaması ilə bağlı hansısa iş aparılmır. Buna görə məncə, məktəblərdə daha mütəşəkkil iş qurulsa, yaxşı olar”, - deyə Məhərrəmov vurğulayıb.</p> </blockquote> <p>Əlavə edib ki, ixtisaslarla bağlı “ixtisas.az” adlı bir platforma var: “Həmin platformanın əhatə dairəsini genişləndirsək və ya ona bənzər bir platforma yaratsaq və bütün şagirdlər arasında yaysaq, onlar artıq bir çox ixtisas haqqında məlumat sahibi olacaqlar və bir çox hallarda məsləhətləşməyə ehtiyac qalmayacaq. Onlar özləri nə istədiklərini başa düşəcək, dəqiqləşdirəcəklər. Kodlaşdırmaya qaldıqda isə İKT biliyi olan hər kəs bunu özü edə bilər”.</p>
<p><strong>“Xarici ölkədə peyvənd olunmuş şəxslərin COVID-19 pasportu ölkəmizdə tanınırmı” sualına verilən cavablara diqqət</strong></p> <p>Xarici ölkədə vaksinasiya olunmuş şəxsləri COVID-19 pasportunun ölkəmizdə tanınıb-tanınmayacağı ilə bağlı sual narahat edir. Vaksinasiya ilə bağlı məhdudiyyətlərin günü-gündən artması fonunda ortaya çıxan saysız-hesabsız suallar kimi buna da cavab tapmaqda çətinlik çəkənlər var.</p> <p>AYNA suala cavab tapmaq üçün məsul qurumların mətbuat xidmətləri ilə əlaqə saxlayıb.</p> <p>Beləliklə “Xarici ölkədə peyvənd olunmuş şəxslərin COVID-19 pasportu ölkəmizdə tanınırmı? Bununla bağlı problem yaşayacaq şəxslər hara müraciət etməlidirlər?” suallarına mətbuat xidmətlərinin cavabı belə olub:</p> <p><strong>İcbari Tibbi Sığorta üzrə Dövlət Agentliyi</strong>: “Bu, bizim səlahiyyətimizdə olan bir məsələ deyil. Zəhmət olmasa, Səhiyyə Nazirliyi və TƏBİB ilə əlaqə saxlayın”.</p> <p><strong>Səhiyyə Nazirliyi</strong>: “Bu, bizə aid məsələ deyil. Biz icraçıyıq”.</p> <p><strong>Nazirlər Kabinetinin mətbuat xidməti</strong>: “Bu sorğulara İcbari Tibbi Sığorta, TƏBİB və Səhiyyə Nazirliyi cavab verir”.</p> <p><strong>TƏBİB</strong>: “Nazirlər Kabineti yanında Operativ Qərargahın brifinqində Azərbaycan Prezidentinin İqtisadi məsələlər üzrə köməkçisi Şahmar Mövsümov bu məsələyə aydınlıq gətirmişdi. Mövsümov bildirmişdi ki, xarici ölkədə vaksin olunubsa, Səhiyyə Nazirliyinin 9103 “qaynar xətt”i ilə əlaqə saxlamalı və sənədlərini təqdim etməlidir. Əgər sənəd saxta deyilsə, sistemə daxil ediləcək”.</p> <p>TƏBİB-in cavabından belə məlum oldu ki, sualımızın cavabı Səhiyyə Nazirliyində olsa da, özlərinin belə, bundan xəbərləri yox imiş.</p> <p>Sosial mediada Səhiyyə Nazirliyinə saysız-hesabsız suallar ünvanlanır. İnsanlar Nazirliyin “qaynar xətt”inin daim məşğul olduğundan, suallarına cavab tapa bilmədiklərindən şikayətçidirlər. Bir sözlə, sözügedən Nazirlik insanların səhhətinin keşiyində dura bilmədiyi, aciz qaldığı kimi, cəmiyyəti düşündürən sualları ünvanladığımızda mətbuat xidməti də çıxış yolunu suallara cavab verməkdən yayınmaqda görür.</p>
<p><strong>Etirazçılar tələblərinin yerinə yetirilməsi üçün hökumətə bir həftə vaxt veriblər</strong></p> <p>Azərbaycan Laçın rayonunu işğaldan azad etdikdən sonra işğal dövründə qeyri-qanuni şəkildə orada məskunlaşmış, indi isə Ermənistana getmiş ermənilər İrəvanda hökumət binası qarşısında aksiya keçirirlər. AYNA erməni mediasına istinadən bildirir ki, etirazçılar ölkəni tərk edə bilmələri üçün səlahiyyətlilərdən təzminat və qaçqın statusu verilməsini tələb ediblər.</p> <p>“Tezliklə burada olduğumuzdan bir il keçəcək, amma indiyə qədər Ermənistan hökumətindən konkret cavab almamışıq. Buradakı yaşayışımız üçün lazım olan şəraitin təmin olunacağı tarixi dəqiq bilmək istəyirik. Yaxud da, bizə Rusiyaya, Avropa ölkələrinə ölkələrinə getmək üçün qaçqın statusu versinlər”, - deyə etirazçılardan biri qeyd edib.</p> <p>Digər etirazçı heç bir ailə üzvünün işi olmadığını, İrəvanda qalmaq istəmədiklərini söyləyib: “Biz paytaxtda qala bilmirik. Torpağa ehtiyacımız var. Kənd yerlərində yaşaya və işləyə bilərik”.</p> <p>Tələblərinin siyasi olmadığını deyən etirazçılar ölkə rəhbərliyinə cavab vermək üçün bir həftə vaxt veriblər.</p> <p>Onların məlumatına görə, Laçın rayonu boşaldılanda təxminən 13 min erməni Laçını tərk edib.</p>
<p><strong>Rəsmi İrəvan 44 günlük müharibədən əvvəlki mövqeyində qalır – bir fərqlə</strong></p> <p>Bu, bir lakmus testidir. Azərbaycan hələ də erməni separatçılarından azad edilməyən Xankəndidə baş verənləri yaxından izləyir. Xatırladım ki, Şərqi Zəngəzur və Qarabağ iqtisadi zonaları Azərbaycan Prezidenti İlham Əliyevin 7 iyul 2021-ci il tarixli sərəncamı ilə yaradılıb. Bu ərazi Azərbaycanın ayrılmaz hissəsidir. Əlbəttə ki, Xankəndi də!</p> <p>Amma Azərbaycan bayrağının hələ qaldırılmadığı ərazidə "Artsax Respublikası Günü"nə həsr olunmuş tədbirlərin keçirilməsi hiddət doğurur. Qarabağ ermənilərini su və lazım olan hər şeylə təmin etməyi öhdəsinə götürmüş rus sülhməramlılarının orada baş verənlərin qarşısını almaq üçün hər cür imkanı var. Amma bu edilmədi və edilmir. Xankəndidə bu və ya digər formada təxribatçı tədbirlər keçirildi.</p> <blockquote> <p>Və rahat şəkildə Xankəndini gəzən Qarabağ separatçılarının başçısı Arayik Arutunyan daha bir təxribat xarakterli bəyanat verdi: “Bizim tarixi bir məsuliyyətimiz var: öz vətənimizdə yaşamaq və yaratmaq, milli dəyərlərimizi və beynəlxalq səviyyədə tanınmış hüquqlarımızı rəhbər tutaraq, Artsax Respublikası qurmaq”.</p> </blockquote> <p>Bu, Azərbaycan qanunlarının birbaşa pozulmasıdır, separatizm maddəsidir. Və rus sülhməramlıları Arutunyana bu cür çıxışlar etməmək barədə xəbərdarlıq edə bilərdi, amma etmədilər. Azərbaycanda hamı bunu gördü və nəticə çıxardı.</p> <p>Ölkəmiz Ermənistan Xarici İşlər Nazirliyinin növbəti təxribatçı bəyanatından da nəticə çıxardı. Orada "Artsax ermənilərinin fiziki varlıq təhlükəsi ilə üzləşdikləri və Azərbaycanın yurisdiksiyası altında yaşaya bilmədikləri" bildirilir. Yalan - Azərbaycan qanunlarını tanımağa razı olan və bu qanunlarla yaşamaq istəyən Xankəndi erməniləri üçün heç bir təhlükənin olmamasındadır. Qalanları qanunlarımız qarşısında tam şəkildə məsuliyyət daşıyacaqlar, çünki özləri separatizm yoluna qədəm qoyublar. Dünyanın bütün ölkələrində isə separatçılara münasibət eynidir.</p> <p>“Qarabağ erməniləri Azərbaycanın yurisdiksiyası altında yaşaya bilməzlər” ifadəsinə gəlincə, rəsmi İrəvanın bu mövqeyi onun Xankəndidə yaşayanların seçimini müəyyənləşdirmək imkanından xəbər verir. Və İrəvandan gələn bu seçim sülh istiqamətində deyil, gələcəkdə çətin, bəlkə də yeni hərbi qarşıdurmalar istiqamətində edildi.</p> <p>Ermənistanın Baş naziri Nikol Paşinyanın Xankəndi sakinlərinə ünvanladığı müraciətdə də bu barədə danışılır: “Qarabağ xalqının öz müqəddəratını təyin etmək hüququ danılmazdır. Bu hüquq güc tətbiq etməklə pozula bilməz”.</p> <blockquote> <p>Və əlavə etdi ki, “bu gün Qarabağ yaralı olsa da, ayaq üstə dayanır və Ermənistanın və bütün ermənilərin tam dəstəyinə və köməyinə malikdir”.</p> </blockquote> <p>Paşinyanın bu çıxışları İrəvanın Azərbaycana qarşı ərazi iddiası siyasətini davam etdirmək niyyətində olduğunu göstərir. Buna görə də Ermənistan tərəfi öz iradəsi ilə ölkəmizlə sülh müqaviləsi imzalamaq və sərhədlərin delimitasiyası və demarkasiyası prosesinə başlamaq istəmir. Yəni rəsmi İrəvan 44 günlük müharibə başlamazdan əvvəlki təxribatçı mövqelərdə dayanır. Yeganə fərq ondadır ki, indi yalnız Xankəndi və ərazimizin kiçik bir hissəsi onların nəzarətində qalıb.</p> <p>Və burada Nikol Paşinyanın və ya Ermənistan Prezidenti Armen Sarkisyanın, habelə Ermənistanın xarici işlər naziri Ararat Mirzoyanın Xankəndiyə gəlməməsi o qədər də vacib deyil. Ümumiyyətlə, Ermənistan parlamentinin deputatlarının Xankəndini ziyarət edib-etməməsinin heç bir əhəmiyyəti yoxdur. Gələrlərsə, Laçın dəhlizindən Xankəndinin girişinə nəzarət edən rus sülhməramlıları üçün daha çox sual yaranacaq. Ancaq ölkəmizdə Rusiya sülhmıramlılarına onsuz da əsaslı bir inamsızlıq var.</p> <p>Şüurlu olaraq və ya başqa səbəblərdən onlara həvalə edilmiş funksiyaların öhdəsindən gəlmədiklərinə dair çoxlu nümunələr var. 10 noyabr 2020-ci il tarixli üçtərəfli bəyanatı nəzərdən keçirin. 4-cü bəndə əsasən, "Rusiya Federasiyasının sülhməramlı kontingenti Ermənistan silahlı qüvvələrinin çıxarılması ilə paralel olaraq yerləşdirilir". Amma bu proses baş vermir. Müntəzəm olaraq görürük ki, əslində rus sülhməramlılarının razılığı ilə və onların arxasından Azərbaycan tərəfinin mövqelərinə necə atəş açılır.</p> <p>İş o yerə çatdı ki, Azərbaycan Rusiya sülhməramlı qüvvələrinin komandanlığından Ermənistan silahlı qüvvələrinin müvəqqəti yerləşdirildikləri Azərbaycan ərazilərinə qanunsuz yerləşdirilməsinə son qoyulmasını tələb etdi. “Son günlər Ermənistan silahlı qüvvələrinin bölmələri Rusiya sülhməramlılarının müvəqqəti olaraq yerləşdirildiyi Azərbaycan ərazisinə keçərək, üçtərəfli bəyanatı pozaraq, Muxtarkand və Şuşakənd yaxınlığında, Laçın rayonunda, eləcə də Kəlbəcərin şərq hissəsində yeni erməni postları qurublar. Azərbaycan ordusu adekvat tədbirlər görür ki, belə hallara yol verilməsin. Lakin Ermənistan tərəfi vəziyyəti gərginləşdirmək üçün məqsədyönlü şəkildə bu cür təxribatlara əl atır”, - deyə Azərbaycan Müdafiə Nazirliyi bir müddət əvvəl qeyd etmişdi.</p> <p>Və bu problemin aradan qaldırılmadığını görürük. Xankəndidə, Rusiya sülhməramlılarının məsuliyyət zonasından keçərək, Ermənistan parlamentinin deputatlarının da Qarabağa gəlişi məlum olarsa, rəsmi Bakı mümkün qədər sərt davranmağa borcludur. Azərbaycan bu şəraitdə, şübhəsiz ki, Qarabağ separatçılarının liderlərini həbs etmək və Xankəndini zorla nəzarətinə qaytarmaq üçün anti-terror əməliyyatı keçirmək hüququnu özündə saxlayır. Rus sülhməramlılarının hazırda orada olması bizi dayandırmamalıdır və dayandıra bilməz. Çünki bura Azərbaycanın ərazisidir.</p>
<p><strong>Giorgi Qaxariya: “Bundan sonra" Gürcü Arzusu" Partiyası mənimlə mübarizə aparacaq”</strong></p> <p>Gürcüstanın keçmiş Baş naziri, “Gürcüstan Naminə” Partiyasının lideri Giorgi Qaxariya paytaxt Tiflis meri postu uğrunda mübarizə aparacağını açıqlayıb. AYNA gürcü mediasına istinadən bildirir ki, Qaxariya mətbuat konfransı keçirib və tədbirdə namizədliyini rəsmən elan edib.</p> <p>“Bundan sonra" Gürcü Arzusu" Partiyası mənimlə mübarizə aparacaq. Çünki bu gün Tiflis meri postu uğrunda mübarizəyə qoşulduğumu rəsmən bəyan edirəm", - deyə sabir Baş nazir vurğulayıb.</p> <p>Onun sözlərinə görə, bu yolla partiyasının seçki kampaniyası zamanı çətinliklərlə üzləşən namizədlərini də dəstəkləyə biləcək: “Yaxın gələcəkdə şəhəri metropol halına gətirmək üçün hər şeyi edəcəm. Paytaxtın inkişaf planını təqdim edəcəyimə söz verirəm”.</p> <p>Qaxariya mer postu uğrunda şəhərin hazırkı meri, hakim “Gürcü Arzusu” Partiyasının namizədi Kaxa Kaladze ilə, sabiq Prezident Mixail Saakaşvilinin qurucusu olduğu “Vahid Milli Hərəkat” Partiyasının rəhbəri Nika Meliya ilə, “Lelo for Georgia” Partiyasından Anna Bibilaşvili ilə və “Xalqlar Naminə” Alyansından namizəd olan Anna Dolidze ilə mübarizə aparmalı olacaq.</p> <p>Qeyd edək ki, Gürcüstanda seçkilər oktyabrın 2-də keçiriləcək. 64 şəhər və bölgənin sakinləri bələdiyyə başçılarını və yerli məsləhət orqanlarının müavinlərini seçəcəklər. Qalib gəlmək üçün bələdiyyə başçılığına namizədlər yaşadıqları ərazidə ən az 50 faiz, majoritar deputatlar üçün isə ən azı 40 faiz səs toplamalıdırlar.</p>
