“Oyun keyfiyyətimiz artıb” – Miodraq Bojoviç

“Bilirdik ki, bu oyun bizim üçün çətin olacaq. Ona görə yox ki, “Qəbələ” Premyer Liqada qalmaq üçün mübarizə aparır. “Qəbələ” yaxşı komandadır. Təcrübəli baş məşqçisi var. İlk hissə elə də maraqlı keçmədi. Futbolçular yaxşı nəfəs ala bilmirdilər. Kilan Lebon şəxsi keyfiyyətləri sayəsində gözəl qol vurdu. İkinci hissədə açıq oyun gedirdi və hər iki tərəfdə səhvlər var idi. Biz də qol vura bilərdik, rəqib də. Qələbə qazandıq. Amma bir az bəxtimiz gətirdi”.

Msport.az xəbər verir ki, bu sözləri “Neftçi”nin baş məşqçisi Miodraq Bojoviç Premyer Liqanın XXVIII turunun “Qəbələ”(1:0) ilə görüşündən sonra keçirilmiş mətbuat konfransında deyib.

O, daha sonra jurnalistlərin suallarını cavablandırıb.

– Qəbələdəki infrastrukturu necə dəyərləndirirsiniz?

– Azərbaycanda ən yaxşı meydança buradadır. Məşq üçün də keyfiyyətli meydançaları var.

– Emin Mahmudovun ehtiyatda qalmasının səbəbi nə idi?

– Bir az ağrı hiss edirdi. Emini növbəti oyuna saxlamaq istədik.

– Sizin gəlişinizdən sonra oyun keyfiyyətində inkişaf var?

– Çempionatda bütün komandalar demək olar ki, eyni səviyyədədir. Digər komandalarla müqayisədə son vaxtlarda bizim keyfiyyətimiz bir az artıb. İndi daha çox qol epizodu yaradırıq və qollar vururuq.

– Müdafiə planında necə?

– Son iki oyunda qol buraxmamışıq. Komanda 11 oyunçu ilə müdafiə olunur. Bəli, bu gün ikinci hissədə çoxlu səhvlər etdik.

– “Sabah” – “Zirə” matçında hansı nəticənin qeydə alınacağını düşünürsünüz?

– Nəsə əldə etmək istəyiriksə, yalnız öz nəticələrimizə baxmalıyıq. Biz rəqiblərimizin səhv etməsini gözləməli deyilik. (sportal)